Канаданинг Британия Колумбиясида дам олиш кунларидан буён давом этаётган кучли ёғингарчилик бир нечта ҳудудда сув тошқинлари ва кўчкиларни юзага келтирди, айрим жойлардаги автомобиллар ва темир йўлларга зарар етган, деб хабар беради «Интерфакс». Провинцияда оммавий эвакуация бошланган. Расмийлар ушбу ёғингарчиликни «100 йил ичидаги энг ёмон довул» деб атамоқда.
Кўчкилар сабаб бир нафар аёл ҳалок бўлган, унинг жасади 15 ноябрь куни Ванкувердан 250 километр узоқликдаги трассадан топилган. Полиция йўлларни сув босиши ва кўчкилар оқибатида қанча автомобилга зарар етганини билмайди, аммо улар табиий офатнинг бошқа қурбонлари бўлиши мумкинлигини истисно этмаяпти. Икки киши бедарак йўқолгани айтилмоқда.
Британия Колумбияси бош вазири ўринбосари ва жамоат хавфсизлиги вазири Майк Фарнуорт вазиятни «экстремал об-ҳаво ҳодисаси» деб атаган ва довул кутилганидан кўпроқ зарар келтирганини тан олган. Минтақа транспорт вазири Майкл Флеминг тўфонни «100 йил ичидаги энг ёмон» деб атаган.
Кўчкилар провинцияни Канаданинг бошқа ҳудудлари билан бирлаштирувчи учта асосий йўлни ёпиб қўйган, Ванкувер билан транспорт алоқаси қисман узилган, шаҳар ва далаларни сув босган. Канададаги энг йирик ҳисобланувчи Ванкувер порти ишини тўхтатган. Мерритт шаҳри расмийлари аҳолини тўлиқ эвакуация қилиш бўйича топшириқ берган (7 минг киши): шаҳарда кўприк қулаган ва канализация тизими ишдан чиққан. Тўғон ёрилган Принстон шаҳрини ҳам қисман сув босган. Кўчкилар сабаб тўсилиб қолган Агассиз шаҳарчаси расмийлари 300 кишини эвакуация қилиш учун вертолётларни йўналтирган.
16 ноябрь куни ёғингарчилик бироз камайгач ва ҳудуд «қуришни» бошлаганида Аббоцфорд шаҳри атрофидаги вазият ёмонлашгани ва у ердан одамлар эвакуация қилинаётгани эълон қилинган. Йўлларнинг қайта тикланишига қанча вақт кетиши ҳозирча айтилмаяпти ҳам.
Маълумотларга кўра, Британия Колумбиясининг айрим ҳудудларида 252 миллиметргача ёғингарчилик кузатилган.
Мамлакат бош вазири Жастин Трюдо ҳозирда Оттавада бўлиб, вазиятни кузатиб бораётгани ва жабр кўрган провинцияга зарурий барча ёрдам кўрсатишини маълум қилган.
Эслатиб ўтамиз, ёзда Британия Колумбиясида рекорд даражада жазирама ва ёнғинлар кузатилган, аномал об-ҳаво оқибатида 500 дан ортиқ одам ҳалок бўлган эди.
Изоҳ (0)