Саудия Арабистони истеъдодли муҳожирларга мамлакат фуқаролигини берди

Саудия Арабистони бир гуруҳ хорижлик мутахассислар (экспатлар), жумладан, шифокорлар ва олимларга фуқаролик берди, деб ёзмоқда Reuters.

Мазкур қарор яқинда эълон қилинган қироллик фармони ортидан қабул қилинди. Фармонга кўра, қиролликнинг улкан ислоҳотлар режасига мувофиқ ривожланишига ёрдам берадиган «мутахассислар ва «жаҳон миқёсидаги фавқулодда ажойиб истеъдодлар»га Саудия Арабистони фуқаролиги берилади. Бу ўзгариш шаҳзода Муҳаммад бин Салмоннинг қироллик иқтисодиётини нефтдан мустақил бўлишини таъминлашга қаратилган иқтисодий ва ижтимоий ислоҳотлар режаларининг бир қисмидир.

Саудия Арабистонида хорижликларни фуқароликка қабул қилиш дастури фан, тиббиёт, маданият, спорт ва технология соҳалари учун зарур бўлган мутахассисларни топишга қаратилган. Унинг мақсади — талабгир мутахассисларнинг ўсиши учун қулай муҳит яратиш.

Маҳаллий матбуот хабарларига кўра, фуқароликка қабул қилинадиган гуруҳга мусулмон уламолари, молиявий экспертлар, муҳандислик, кимё ва алоқа соҳаларига ихтисослашган шифокорлар ва олимлар киритилган.

Шуниси эътиборга лойиқки, Форс кўрфази мамлакатларида фуқароликни олиш ҳар доим жуда қийин бўлган, чунки у одатда минтақада яшовчи хорижликларга ва чет элликларга берилмайди. Мутахассисларнинг айтишича, Саудия Арабистони бу ташаббусдан иқтисодий ва ижтимоий фойда кўради, чунки фармон қиролликка кўплаб истеъдод эгаларини жалб қилади.

Июнь ойида Саудия Арабистони ҳукумати турмуш қурмаган, ажрашган ёки бева аёлларга эркак васийларнинг розилигисиз ҳам ёлғиз яшаши учун рухсат беришга қарор қилганди. Бундан ташқари, қамоқда бўлган аёлнинг жазо муддати тугаганда у ўз васийига топширилмайди. Адвокат Наиф ал-Мансийнинг сўзларига кўра, оилалар эндиликда ёлғиз яшашни танлаган қизларига қарши даъво қўзғата олмайди.