Илон Маск бутун дунёда одамлар очарчилиги муаммосини ҳал этиш бўйича аниқ режани кўрса, унинг ижросига 6 млрд ажратишини ёзганди. БМТ режа лойиҳасини эълон қилди

Октябрь ойида Бирлашган миллатлар ташкилотининг Бутунжаҳон озиқ-овқат дастури ижрочи директори Дэвид Бизли CNN’га берган интервьюсида миллиардер Илон Маск бойлигининг 2 фоизи (тахминан 6 миллиард АҚШ доллари) 42 миллион аҳолини бир йил давомида очликдан қутқариши мумкинлиги ҳақида гапирганди.

Илон Маск бу гапларга жавобан Twitter’да агар БМТ маблағнинг қандай қилиб муаммони ҳал этишини тавсифлаб берса, Tesla акцияларини сотиши ва 6 миллиард долларни ташкилотга тақдим этиши ҳақида ёзган.

15 ноябрь куни Бутунжаҳон озиқ-овқат дастури миллиардерларга мурожаат йўллади ва унда 6,6 миллиардлик режанинг қай йўсинда амалга оширилиши ҳақида маълумот берди.Ушбу пулларнинг 3,5 миллиарди озиқ-овқатлар хариди, уларни ҳаво, ер усти ёки сув йўли орқали етказиб бериш, ҳайдовчилар маоши ва ҳарбий низолар содир бўлаётган ҳудудларда етказиб берувчиларга ҳамроҳлик қилувчи одамларга сарфланади. 2 миллиард доллар молиявий кўмакка муҳтож аҳоли учун пул ёки озиқ-овқат купонлари ажратишга ишлатилади, улар ёрдамида мамлакатлар маҳаллий иқтисодиётини қўллаб-қувватлаш мумкин.

700 миллион доллар 43 та мамлакатда егуликларни тарқатиш дастури ва ваучерларга сарфланади. 400 миллион доллар миқдоридаги маблағ маъмурий сарф-харажатлар, моддий таъминотни мувофиқлаштириш, етказиб бериш шартномалари, дунёдаги вазиятни мониторинг ва таҳлил қилишга кетади.

Июль ойида БМТ COVID-19 коронавирус пандемияси туфайли дунёда очарчилик муаммоси мураккаблашгани, жаҳон бозорида маҳсулотлар етишмовчилиги кузатилаётганини маълум қилган.

БМТ Бутунжаҳон озиқ-овқат дастури берган ахборотга кўра 2021 йил ноябрь боши ҳолатига кўра, 43 та мамлакатдаги 45 миллион аҳоли очарчиликдан азият чекмоқда. Йил бошида ушбу рақам — 42 миллионни, 2019 йилда эса 27 миллионни ташкил қилган.

Октябрь охирида Илон Маск Forbes рейтинги тарихидаги энг бой одамга айланган, ноябрь бошида унинг бойлиги 300 миллиард доллардан ошган, бироқ кейинчалик Tesla акциялари нархининг пастлаши туфайли Маск икки кунда 50 миллиард доллар йўқотгани, акциялар нархи тадбиркор Twitter’да сўровнома ўтказгандан сўнг тушиб кетгани хабар қилинганди.