Япониядаги «Генкай» атом электр станцияси (АЭС) ҳудудида ёнғин содир бўлди. Бу ҳақда NHK агентлиги хабар берди.
Kyushu Electric Power матбуот хизматининг маълум қилишича, ёнғин бир соат ичида тўлиқ ўчирилган. Шу билан бирга, олов энергия блоклари ишига таъсир қилмаган.
Ёнғин АЭС ҳудудидаги «жиддий аварияларга жавоб қайтариш объекти» қурилаётган майдонда содир бўлган, у ерда ҳаво кемалари томонидан терактлар содир этилган тақдирда фойдаланиш учун захира диспетчерлик хонаси мавжуд. Ёнғин чиққан пайтда қурилиш ҳали давом этаётган эди.
Хабарга кўра, ёнғин натижасида ҳеч ким жабрланмаган, радиоактив моддалар ажралиб чиқмаган, атроф-муҳитга ҳамда 3 ва 4-энергетика блокларига зарар келтирилмаган.
Айни пайтда мутахассислар ҳодиса сабаблари ва ҳолатларини ўрганмоқда.
Эслатиб ўтамиз, бундан ўн йил олдин Япониядаги Фукусима АЭСда 20 минг кишининг ҳаётига зомин бўлган улкан фалокат юз берганди. Қарийб 9 баллик зилзила ортидан келиб чиққан цунами АЭСни ишдан чиқарган. Оқибатда хавфли радиация тарқалиб, инсон ҳаёти ва атроф-муҳитга таҳдид сола бошлаган ва станция атрофидаги 160 мингдан зиёд аҳоли ўз уйини тарк этишга мажбур бўлган. Япония ҳукуматининг Фукусимадаги ҳаётни қайта тиклашга бўлган саъй-ҳаракатларига қарамай, аксарият маҳаллий аҳоли радиоактив таъсир хавфи ва инфратузилманинг етишмаслиги сабабли хароба ҳудудларга қайтишни истамаяпти.
Баҳорда Япония ҳукумати Фукусима АЭСнинг тозаланган радиоактив сувларини океанга чиқариб юборишга қарор қилди. Маҳаллий ОАВ маълумотларига кўра, Фукусиманинг чиқинди сувлари махсус омборларда сақланади, улар тозаланган, лекин таркибида аввалгидек радиоактив тритий мавжуд.
Ҳукумат қарорига кўра, АЭСдаги радиоактив моддалардан тозаланган сув икки йилдан сўнг Тинч океанига қуйилишни бошлайди. Хитой бунга норозилик билдирган, АҚШ эса қарорни қўллаб-қувватлаган.
Изоҳ (0)