Туркия ҳукумати Гаити президенти Жовенел Моизни ўлдиришда иштирок этгани гумонланаётган шахслардан бирини ҳибсга олди. Бу ҳақда Гаити ташқи ишлар вазири Клод Жозефга таяниб, «Korrespondent.net» хабар берди.
«Ҳозиргина Туркия вазири, дўстим Мевлут Чавушўғлу билан телефон орқали суҳбатлашдим ва президентнинг ўлдирилишида гумон қилинганлардан бири Самир Ҳандални ҳибсга олгани учун Туркияга миннатдорлик билдирдим», — деб ёзди Жозеф Twitter’да.
Интерпол томонидан қидирувга берилган Ҳандал АҚШдан Иорданияга учиш учун Туркияда самолёт алмаштираётган пайтда Истанбул аэропортида қўлга олинган, деб ёзмоқда Reuters агентлиги.
Эслатиб ўтамиз, Гаити президенти Жовенел Моиз 2021 йилнинг 7 июлига ўтар кечаси қуролли ҳужумчилар томонидан ўз қароргоҳида отиб ўлдирилган. Ҳодисада президентнинг рафиқаси ҳам оғир жароҳат олган, аммо у АҚШга олиб кетилиб, тиббий ёрдам билан ҳаёти сақлаб қолинган.
Ҳодисадан сўнг Клод Жозеф муваққат ҳукумат раҳбари этиб тайинланди. Мамлакатда эса 15 кунга ҳарбий ҳолат ва миллий мотам эълон қилинди.
Гаити ҳукумати президент Моизни ўлдирган ёлланма аскарлар гуруҳида камида 28 киши — 26 нафар Колумбия фуқароси ва келиб чиқиши гаитилик икки нафар АҚШ фуқароси бўлганини аниқлади.
Кейинроқ Жовенел Моизга қарши операцияни тайёрлашда марказий шахс бўлиши мумкин бўлган одам — келиб чиқиши гаитилик бўлган шифокор Кристиан Эммануэль Санон ҳибсга олинди.
Изоҳ (0)