Литвалик дизайнер Симонас Паловис ишда стресс ва ғазабни бошқариш учун мўлжалланган янги интерактив ўйинчоқ ишлаб чиқди. OLLY деб аталувчи бу ихчам қурилма кўринишидан турли юз ифодасига эга юмшоқ стол ўйинчоғига ўхшайди, лекин аслида у анти-стресс функциясини ҳам бажаради.
ОLLYга жисмоний таъсир ўтказилганда, масалан, уни сиққанда, чимчилаганда, урганда ёки эзганда у юз ифодасини ўзгартиради, бу эса интерактивлик эффектини беради. Ўйинчоқ турли механик ҳаракатларга бардош бера олади, унинг материали эса узоқ муддат фойдаланганда ҳам ўз шаклини йўқотмайди.
ОLLYни ишлаб чиқиш ғояси Паловиснинг шахсий тажрибасидан келиб чиққан. Илгар офисда ишлаган вақтида у кўп марта жаҳлини боса олмаган. Шу сабабли дизайнер ушбу қурилмани ғазабни очиқчасига намоён қилиш ноўрин бўлган ҳолатларда фойдаланиш учун ишлаб чиққан. Масалан, ОLLY ёрдамида офисда салбий ҳис-туйғуларни хавфсиз ифода этиш мумкин.
Бундан аввал Паловис бошқа бир нечта инновацион лойиҳаларни ҳам яратган. Хусусан, Ахis номли трансформер стол ҳамда 2018 йилда Design Award мукофотини олган WЕЕ! столи унинг ғояси. Шунингдек, у Electrolux Design Lab танловида намойиш этилган Буд лойиҳасининг муаллифи ҳисобланади.
Ҳозирча OLLY ўйинчоғининг техник хусусиятлари, жумладан, материал таркиби, юз ифодасини ўзгартириш учун жавобгар электрон тизим ҳақида маълумот очиқланмаган.
Изоҳ (0)