Gaiti hukumati o‘z qarorgohida otib o‘ldirilgan mamlakat prezidenti Jovenel Moizga qarshi operatsiyani tayyorlashda markaziy shaxs bo‘lishi mumkin bo‘lgan odamni hibsga oldi. Bu haqda Constant Haiti’ga tayanib, “RBK” xabar berdi.

Foto: Reuters

Hibsga olingan shaxs — kelib chiqishi gaitilik bo‘lgan shifokor Kristian Emmanuel Sanon. Shu bilan birga, u ko‘p vaqtini Florida shtatida o‘tkazadi, deyiladi xabarda.

Gaiti milliy politsiyasi rahbari Leon Sharlning so‘zlariga ko‘ra, Sanon o‘ldirish operatsiyasini uyushtirishda muhim rol o‘ynagan. “U iyun oyida siyosiy maqsadda xususiy samolyot bilan uchib kelgan va ushbu qotillikni amalga oshirgan odamlarni yollash uchun xususiy xavfsizlik firmasiga murojaat qilgan”— dedi Sharl.

Uning aniqlik kiritishicha, ushbu xususiy xavfsizlik kompaniyasi politsiya fikriga ko‘ra, Venesuelaning asosi AQShda joylashgan CTU kompaniyasi bo‘lgan.

Davlat rahbarining o‘ldirilishi bilan bog‘liq ish bo‘yicha 17 nafardan ortiq gumonlanuvchi hibsga olingan, ular orasida kelib chiqishi gaitilik bo‘lgan AQShning ikki fuqarosi ham bor.

Rasmiylar ushbu to‘da 28 kishidan iboratligini, ular asosan kolumbiyaliklar ekanini da’vo qildi. Hibsga olingan ikki AQSh fuqarosi guruhning qolgan qismi uchun tarjimonlik qilganini aytdi. Ularning so‘zlariga ko‘ra, hujumchilar prezidentni o‘ldirishni emas, balki hibsga olishni mo‘ljallagan.

Jovenel Moiz Gaiti poytaxti Port-o-Prensdagi qarorgohida 7-iyulga o‘tar kechasi o‘ldirildi. Prezident o‘ldirilishi oldidan qiynoqqa solingani ma’lum bo‘ldi. Uning rafiqasi o‘qotar quroldan yaralanib, dastlab mahalliy kasalxonaga yetkazildi, so‘ng davolanish uchun AQShga yuborildi.

Gaiti hukumati prezidentni o‘ldirishda gumonlanib, 15 nafar kolumbiyalik va ikki nafar amerikalik qo‘lga olinganini ma’lum qildi. Yana ikki gumonlanuvchi (ular ham Kolumbiya fuqarolari) politsiyachilar bilan otishmada o‘ldirildi. Suiqasdning ishtirokchilari deb taxmin etilayotgan yana bir necha kishi qochib ketishga muvaffaq bo‘ldi.

Prezidentning o‘ldirilishi munosabati bilan Gaiti hukumati AQShga murojaat qilib, mamlakatga infratuzilmaning juda muhim obyektlarini himoya qilish uchun cheklangan qo‘shinlar kontingentini yuborishni so‘radi.

Gaitining mahalliy Juno7 nashri xabariga ko‘ra, prezidentning o‘ldirilishi fonida yuzaga kelgan siyosiy inqirozni tartibga solish uchun AQSh Gaitiga o‘zining katta delegatsiyasini yuboradi.