Қирғизистон Коллектив Хавфсизлик шартномаси ташкилотидаги (КХШТ) вакили Бердибек Асановни лавозмидан озод қилди – энди унинг ўрнини Ҳаво мудофааси кучлари қўмондони ўринбосари Эмиль Тўқаев эгаллайди. Бу ҳақда Бишкекдаги матбуот анжуманида республика мудофаа вазири Бахтибек Бекпўлатов маълум қилди.
«Бердибек Асановни лавозимга тайинлаш вақтида қонунбузарликларга йўл қўйилган. Мудофаа вазирлиги унинг номзоди Хавфсизлик Кенгаши томонидан тасдиқланмагани ҳақида маълумот олди. Мен Хавфсизлик Кенгашининг ҳужжатига асосландим. Бундан ташқари, Асановни лавозимидан озод этишда унинг маънавий ва ишга оид сифатлари ҳам ҳисобга олинди», — деди вазир.
Бекпўлатовнинг айтишича, бундан ташқари Асанов унга пора беришга уринган.
«Фаолиятимнинг биринчи куниданоқ коррупцияга қарши курашиш масаласини кўтарганман. Порахўрлик билан шуғулланганлар мансаб ва мартабаларидан қатъи назар, ишдан бўшатилади. Бердибек Асанов олдимга конверт билан келди, уни хонадан ҳайдадим. Шундан сўнг олдимга ўринбосарларим келиб қолди. У нима учун пора таклиф қилаётганини айтишга улгурмади. Бу қайд этилмагани ва Асановнинг қўлига кишан тақилмаганидан афсусдаман», — дея хулоса қилди мудофаа вазири.
Ўз навбатида, вазирликнинг юридик таъминлаш бошқармаси бошлиғи Бахтибек Молдобоевнинг айтишича, Бердибек Асанов 2009 йилда икки йилга қамалган. Кейинчалик Ҳарбий суд қарори билан у Мудофаа вазирлиги гаровига топширилган.
«Бердибек Асанов эгаллаб турган лавозим тоифасида офицер покиза обрўга эга бўлиши шарт. Уни Москвага жўнатишганда, бу дақиқалар ҳисобга олинмаган. Хавфсизлик Кенгашидан хат олингач, у лавозмидан олиб ташланди», — дея тушунтирди Молдобаев.
Асанов 2021 йилнинг май ойида Қирғизистоннинг КХШТдаги вакили этиб тайинланган эди. Орадан беш ой ўтгач, Қирғизистон ҳукумати уни қайтаришга қарор қилди. КХШТ Бирлашган штаб бошлиғи ўринбосари лавозимида ишлаб келган Асанов бу қарорни ноқонуний деб ҳисоблаб, судга даъво аризаси берган.
Асанов КХШТга тайинланишидан олдин Қирғизистон Қуролли кучлари Бош штабида ишлаган, 2019—2020 йилларда эса 8-гвардия мотоўқотар дивизияси командири бўлган. У мазкур лавозимдан «ишончли бўлинмалар устидан назоратнинг заифлиги, ҳарбий интизомнинг паст даражаси ва хизматдаги камчиликлар учун» озод қилинган. Қайд этилишича, бунга шартнома асосида хизмат қилаётган аскарни электр токи уриши билан боғлиқ фавқулодда вазият сабаб бўлган.
Изоҳ (0)