Хитой раҳбари Си Цзиньпин ҳам бундан буён «Хитой қайта тикланиш даврининг йўлбошчиси» деб аталади. Бу ҳақда Хитой Коммунистик партияси вакилига таяниб, ғарб оммавий ахборот воситалари хабар қилмоқда.
Шу пайтгача фақат ХХР асосчиси Мао Цзэдунгина бундай унвонга сазовор бўлган — Хитойда уни «буюк йўлбошчи» деб аташган.
11 ноябрь куни Хитой Коммунистик партияси Марказий Қўмитаси (ХКП МҚ) «тарихий резолюция»ни қабул қилиб, партиянинг ўтган асрда, жумладан, Си Цзиньпин раҳбарлигида эришган ютуқларини эътироф этди. Ҳужжат ХХРнинг амалдаги президенти сиёсатини қўллаб-қувватлашни давом эттиришга чақиради. ОАВ таъкидлашича, бу Хитой раҳбарининг ваколатларини кучайтиришга ёрдам берди.
Хабарларга кўра, Хитойда ХКП ютуқлари ҳақидаги бундай ҳужжат тарихда учинчи марта қабул қилинмоқда. Бунгача 1945 йилда Мао Цзэдун ва 1981 йилда Дэн Сяопин резолюцияси маъқулланган эди. Шундай қилиб, ушбу ҳужжатни қабул қилиш йўлидаги қадам ХХРнинг амалдаги президенти эришган ютуқларни юқорида тилга олинган икки собиқ Хитой етакчилариники билан тенглаштиришга қаратилган.
Резолюция матнида «бутун партия, бутун армия ва барча этник гуруҳлар халқларини партия Марказий Қўмитаси атрофида янада жипслашишга, Си Цзиньпин бошчилигида Хитойга хос социализмнинг янги даврига ўтишни тўлиқ амалга оширишга» чақирилади.
Оммавий ахборот воситаларининг таъкидлашича, Си Цзиньпин таълимотининг қабул қилиниши унинг машҳурликка эришганини англатади, бу унга ХХР раиси сифатида учинчи муддатга сайланиш ва фаолиятини 2027 йилгача давом эттириш имконини беради.
Си Цзиньпин 2013 йилнинг март ойидан буён Хитой Халқ Республикаси раиси ҳисобланади.
Изоҳ (0)