Эрон ташқи ишлар вазирининг ўринбосари Али Багерий Эрон ва Буюк Британия 1979 йилда Теҳронга танклар етказиб берилмагани бўйича 400 миллион фунт стерлинг (535 миллион доллар) миқдорида қарзини тўлаш бўйича келишувга эришди, деб хабар беради «РИА Новости».
«Қарзни қайтариш борасидаги асосий масала ва унинг миқдори келишилган, аммо тўлов усули ва жараёни ҳозирча ҳал этилмаган», — дейди эронлик дипломат.
БМТнинг Халқаро суди 2012 йилда Буюк Британияни 1974 йилда International Military Services (IMS) компанияси ва Эрон ўртасида имзоланган шартноманинг бузилиши бўйича компенсацияни тўлашга чақирган эди. Ушбу битим бўйича компания Эронга мингдан ортиқ Британия танкларини етказиб бериши керак бўлган, аммо 1979 йили Эронда юз берган инқилоб сабаб Лондон шартнома шартларини бажаришдан бош тортган. Теҳрон ҳозирга қадар бунинг учун компенсация ундириб кела олмаётганди. Англия ҳукумати Эрон Мудофаа вазирлиги санкциялар остида бўлгани сабаб қарзини қайтара олмаслигини таъкидлаб келмоқда.
Аввалроқ Эрон Буюк Британия, Франция ва Германия билан ядровий битимга қайтиш юзасидан музокаралар ўтказишга тайёрлигини билдиргани, Жо Байден Эронга қарши 1979 йилда жорий этилган санкцияларни узайтиргани тўғрисида хабар берилганди.
Изоҳ (0)