Туркманистон президентига пахта режаси тўлиқ бажарилгани ҳақида ҳисобот берилди

Туркманистонда 11 ноябрь куни бўлиб ўтган йиғилишда бош вазирнинг агросаноат комплекси масалалари бўйича ўринбосари Эсенмурат Оразгелдиев мамлакат президенти Гурбангули Бердимуҳамедовга 1 миллион 250 минг тонна миқдоридаги пахтани йиғиштириб олиш режаси тўлиқ бажарилгани ҳақида ҳисобот берди.

Туркманистон давлат ахборот агентлиги хабарига кўра, давлат раҳбари алоҳида фидокорлик кўрсатган пахтакорларни давлат мукофотлари билан тақдирлаш бўйича топшириқ берди. Тақдирлаш маросимини, шунингдек, 13 ноябрь куни «Мекан» саройида Ҳосил байрами муносабати билан ўтказиладиган тантаналарни тайёрлаш ва олиб бориш парламент раиси Гулшат Маммедова, бош вазир ўринбосари Оразгелдиэв ҳамда Аграр партия марказий кенгаши раиси Бяшим Аннагурбановга юклатилди.

Агентликнинг ёзишича, Ашхободга ҳар бир вилоятдан болалар олиб келинган, улар Туркманистон президентига «қишлоқ аҳлининг меҳнатдаги ғалабасини ифодаловчи» оппоқ пахта билан лиқ тўлдирилган хуржунларни келтирган ва шеър ўқиган. Бердимуҳамедов уларга совға-саломлар топшириб, эсдалик учун суратга тушган.

1 ноябрь куни вилоятлар раҳбарлари билан бўлиб ўтган йиғилишда Гурбангули Бердимуҳамедов пахта теримини якунлаш муддати ўтиб кетаётганидан норози бўлиб, вилоятларнинг айрим туманларида «оқ олтинни» йиғиштириб олиш даражаси паст эканини айтган.

Жорий йилда Бердимуҳамедов «Мустақиллик байрамига (27 сентябрь) қадар режалаштирилган миқдордаги пахтани топшириш»га фармойиш бериб, «Ҳозирги кунда асосий вазифа — ушбу қутлуғ санага қадар давлатга пахта топшириш бўйича шартнома мажбуриятларини бажариш» эканини айтган. Пахта режасининг бажарилгани тўғрисида 2020 йилда 5 ноябрь куни, 2019 йилда эса 8 ноябрь куни эълон қилинганди.

Туркманистон раҳбари 20 сентябрь куни Мустақиллик байрами муносабати билан мансабдор шахсларни мукофотлаш ҳақида гапирар экан, вилоят ва туманлар ҳокимларига медалларни пахта ҳосили муваффақиятли йиғиб олингандан кейингина топшириш ҳақида топшириқ берганди.