Жанубий Корея Ким Чен Ин ҳокимиятга келганига 10 йил тўлиши арафасида Шимолий Кореядаги вазиятни кузатмоқда

Жанубий Корея Пхеньянда Шимолий Корея етакчиси Ким Чен Ин ҳокимият тепасига келганининг 10 йиллиги муносабати билан йирик тадбир ўтказилиши эҳтимолини кузатмоқда. Бу ҳақда Yonhap нашри хабар берди.

«Ҳозирча Шимолий Корея бундай юбилей тадбирни режалаштираётгани ҳақида эълон қилмади, аммо биз тегишли қадамларни кузатишда давом этяпмиз», — деди Жанубий Кореянинг икки Кореяни бирлаштириш бўйича вазирлиги вакили ўринбосари Чха Ток Чхол навбатдаги матбуот анжуманида.

Қайд этилишича, Шимол Ким Чен Иннинг сиёсий мақомини оширишда давом этмоқда. Масалан, октябрь ойида Жанубий Корея Миллий разведка хизмати расмий учрашувларда собиқ етакчилар Ким Чен Ир ва Ким Ир Сеннинг портретлари олиб ташланганини маълум қилган эди. Шунингдек, Ким Чен Ин расмийларга мамлакатда янги мафкура – «кимченинизм»ни тарғиб қилишга кўрсатма берганди. Жанубий Корея разведкачилари «кимченинизм» атамаси КХДР ҳукумат доираларида аллақачон фаол қўллана бошлаганини аниқлаган. Шу билан бирга, Шимолий Корея давлат оммавий ахборот воситалари Ким Чен Инни «буюк етакчи» деб аташни бошлаган – авваллари бу атама фақат КХДР раҳбарининг бобоси ва Шимолий Корея давлати асосчиси Ким Ир Сенга нисбатан қўлланган.

Бирлашиш вазирлиги вакилига кўра, буларнинг барчаси йил бошида ҳукмрон партия Ким Чен Инни «бош котиб» этиб тасдиқлаганидан кейин КХДРда одамларнинг унга содиқлигини намойиш қилишга қаратилган ҳаракатларнинг бир қисмига ўхшайди. Айни пайтда, унинг таъкидлашича, Ким Чен Ин бир ой давомида омма олдида чиқиш қилмаган.

«Биз Ким Чен Иннинг жамоат фаолияти билан боғлиқ қадамларини кузатишда давом этамиз», — деди вазирлик вакили.

У Шимолий Корея етакчисининг фаолияти нисбатан узоқ вақт давомида давлат матбуотида ёритилмаган бир қанча ҳолатлар аввал ҳам бўлганини эслатиб ўтди.

Ким Чен Иннинг отаси, КХДР собиқ раҳбари Ким Чен Ир 2011 йилнинг 17 декабрида мамлакат бўйлаб сафари чоғида 70 ёшида вафот этган. Унинг вориси сифатида кенжа ўғли Ким Чен Ин КХДР етакчиси деб эълон қилинган.