Буюк Британия ҳукумати парламент аъзоси Оуэн Патерсонни истеъфога чиқариш жараёнида юзага келган коррупцион можаро муваффақиятсиз ҳал этилгани учун узр сўради. Бу ҳақда Reuters хабар берди.
Агентликнинг таъкидлашича, пулли лоббичилик қоидаларини бузган ва бош вазир Борис Жонсонга нисбатан нотўғри муносабатда бўлган қонунчи Оуэн Патерсон қўзғаган можаро, консерватив ҳукумат обрўсига путур етказган сўнгги жанжаллардан бири ҳисобланади.
Хабарга кўра, собиқ атроф-муҳит вазири ва парламент аъзоси Оуэн Патерсон мустақил комиссия суриштирувидан сўнг истеъфога чиққан. Сиёсатчи икки компанияга маслаҳатчилик қилган, бу аслида, парламент қоидаларига зид эмас. Бироқ мустақил тергов шуни кўрсатдики, у бир неча бор ўз мансабини суиистеъмол қилиб, ушбу компаниялар учун лоббичилик қилган. Бундай хатти-ҳаракатлари учун депутатлар 30 кун давомида мажлисларда иштирок этишдан четлаштирилиши керак, аммо бундай қарор парламентда овоз бериш йўли билангина қабул қилиниши мумкин.
Бироқ бу гал овоз бериш ўтказилмаган, чунки Буюк Британия бош вазири ва бошқа бир қатор консерваторлар бутун жараённи адолатсизлик деб ҳисоблаб, жиноий жавобгарликка тортиш қоидаларини ўзгартиришни таклиф қилган. Ўзгартиришлар кўпчиликнинг овози билан қабул қилинган.
Қайд этилишича, Жонсоннинг ўзи ўтган ҳафта парламентни қоидаларни ўзгартириш учун шошилинч овоз бериш орқали Патерсонни ҳимоя қилишга ундаган, кейин эса буни рад этиб, Жамоатлар палатасини довдиратиб қўйган. Шундан сўнг Патерсон парламентни тарк этган.
«Мен вазир ҳамкасбларимнинг ўтган ҳафта йўл қўйган хатосидан афсусда эканимни билдирмоқчиман», — деди вазир Стив Барклай парламентнинг Жамоатлар палатаси мажлисида Патерсон ишининг оқибатлари бўйича мунозаралар чоғида.
Жонсоннинг ўзи касалхонага ташриф учун олдиндан ёзилиб қўйилганини айтиб, мунозарада қатнашмади. Натижада Лейбористлар партияси раҳбари ва Европа Иттифоқидан чиқиш бўйича вазир сер Кир Стармер Жонсонни қўрқоқликда айблади. Стармер парламентга Жонсоннинг ҳаракатлари унга, унинг партиясига ва Британия демократиясининг ишончига путур етказганини айтди.
«Бош вазир коррупцияга яшил чироқ ёқса, бу ишончга путур етказади», — деди у.
Собиқ консерватив бош вазир Жон Мейжор ҳам Жонсон ва унинг вазирларини «сиёсий коррупцияда» айблади. Парламентнинг яна бир аъзоси Крис Брайантнинг айтишича, қоидаларни бузганлик учун жазолаш эмас, сўнгги дақиқада қоидаларни ўзгартириш адолатсизлик.
Reuters таъкидлашича, Патерсон иши Жонсон ҳукумати даврида ахлоқий меъёрларга амал қилиш ёки қилинмаслиги билан боғлиқ бир нечта жанжаллардан биридир.
The Sunday Times ва Open Democracy газеталарининг биргаликдаги суриштируви вазиятни янада оғирлаштирди. Унда маълум бўлишича, ҳукмрон Консерватив партиянинг бадавлат валинеъматлари 3 миллион фунт стерлинг (4 млн доллар) хайрия эвазига парламентнинг юқори палатаси ва Лордлар палатасидаги ўринларга эга бўлмоқда.
Изоҳ (0)