Россияда коронавирус туфайли бир суткада 1200 дан ортиқ киши вафот этди. Бу пандемия бошидан буён мутлақ рекорд

Россияда ўтган бир кеча-кундуз давомида 1211 киши коронавирус оқибатида вафот этди. Бу ҳақда мамлакатнинг COVID-19 га қарши кураш бўйича федерал тезкор штабига таяниб, «РБК» хабар берди.

Бу коронавирус пандемияси бошлангандан бери Россияда қайд этилган мутлақ максимал кўрсаткич. Аввалги энг кўп ўлим ҳолатлари 5 ноябрь куни кузатилган, ўшанда 1192 киши COVID-19 дан вафот этган.

Россия Федерацияси таркибига кирувчи 85 та ҳудудда ўтган суткада яна 39 160 кишида коронавирус аниқланган.

COVID-19 билан кунлик касалланиш ҳолатлари бўйича етакчи ҳудудлар:

• Москва — 5287 киши;
• Москва вилояти — 2818;
• Санкт-Петербург — 2680;
• Самара вилояти — 1783 йил;
• Қрим Республикаси — 803 киши.

«Спутник V» вакцинасини ишлаб чиқарувчи Гамалея маркази директори Александр Гинсбург агар коронавирусга қарши эмлаш тезлиги кескин оширилса, бир неча ой ичида вирус тарқалишини бартараф этиш, шунингдек, эмланганлар ва эмланмаганлар ўртасида «чизиқ тортиш» мумкинлигини айтди.

«Вакцинациядан ажратилган ҳолда киритилган чеклов чоралари амалда фойдасиз. Улар эмланганлар сонини кескин ошириш билан бирлаштирилиши керак», — тушунтирди у. «Москва мэри Сергей Собянин сўнгги ўн кун ичида кунлик эмланганлар сони тўрт баравар ортганини айтди. Буни ўн баравар ошириш керак. Шундагина менинг тахминий ҳисоб-китобларимга кўра, бир неча ой ичида бу инфекцияни енгиш мумкин бўлади. Бундан ташқари, эмланганлар, яъни QR-кодга эга одамлар ва эмланмаганлар ўртасида чизиқ тортилиши керак. Уларни кескин фарқлаш зарур», — деди олим.

Аввалроқ Россияда COVID-19 нинг янги тўлқини юз бераётгани, бунга коронавируснинг дельта («ҳиндча») штамми билан боғлиқ вазият сабаб бўлгани тўғрисида хабар берилганди. Оператив штаб деярли ҳар куни коронавирус билан касалланиш ва ўлим ҳолатлари бўйича антирекордлар ҳақида ҳисобот бермоқда.