Португалия парламенти масофадан ишлашни тартибга солувчи янги қоидаларни қабул қилди. Euronews хабарига кўра, хусусан, менежерларга иш вақтидан ташқари қўл остидагиларни безовта қилиш тақиқланди, акс ҳолда улар жаримага торилиши мумкин.
Шунингдек, янги қоидаларга кўра, масофадан ишлайдиган ходимлар ўз хизмат вазифаларини бажаришга сарфлайдиган электр энергияси ва интернет харажатлари учун қисман компенсация олиш ҳуқуқига эга.
Эндиликда раҳбарият 8 ёшдан кичик фарзанди бор ходимларига, уларнинг хоҳишига қараб, масофадан туриб ишлаш учун рухсат беришга мажбур.
Шу билан бирга, парламент аъзолари ходимларга иш вақтидан ташқари ишга оид чатлар ва мессенжерларни қонуний равишда ёпиш имкониятини берувчи «алоқадан узилиш ҳуқуқини» мустаҳкамлаш тўғрисидаги таклифни рад этди.
Қоидаларда, шунингдек, иш берувчилар камида икки ойда бир марта ходимлар билан шахсий учрашувлар ташкил этиши шарт, бу ишчиларнинг ўзини мулоқотдан маҳрум бўлгандек ҳис қилмаслигини таъминлаш учун зарур.
Янги қоидалар фақат 10 дан ортиқ киши ишлайдиган компанияларга тегишли.
Португалия меҳнат ва аҳолини ижтимоий муҳофаза қилиш вазири Ана Мендес Годинёнинг айтишича, янги қоидалар, жумладан, масофадан туриб ишлайдиган ва яшаш жойини ўзгартириш истагида бўлган юқори малакали чет элликларни мамлакатга кўпроқ жалб қилишга ёрдам беради.
COVID-19 пандемияси туфайли дунё бўйлаб кўплаб компаниялар ўз ходимларини масофадан ишлашга ўтказди. Бундай қарор ҳукумат буйруғи билан ҳам, иқтисодий нуқтаи назардан келиб чиқиб ҳам белгиланиши мумкин бўлди. Жумладан, Россияда бир қатор йирик компаниялар коронавирус туфайли ўрнатилган барча чекловлар олиб ташланганидан сўнг ҳам барча ходимларни иш жойига қайтаришни режалаштирмаганини, аксинча уларнинг бир қисмини масофавий ишда қолдирмоқчилигини эълон қилди.
Изоҳ (0)