Литва ҳукумати Беларусь билан чегарада фавқулодда ҳолат жорий этилишини маъқуллади

Литва Вазирлар Маҳкамаси Ички ишлар вазирлигининг Беларусь билан чегарага яқин ҳудудларда фавқулодда ҳолат эълон қилиш ҳақидаги таклифини маъқуллади. Энди қарор мамлакат парламентида тасдиқдан ўтиши керак, деб ёзади Делфи.

Фавқулодда ҳолатни 10 ноябрь ярим тундан бошлаб бир ой муддатга жорий этиш таклиф қилинган. Режим Литва-Беларусь чегарасининг бутун узунлиги бўйлаб 5 километр чизиқда, шунингдек, рўйхатга олиш пунктларида, Кибартай, Медининкай, Пабрада, Рукла, Вильнюсдаги муҳожирлар жойлаштириладиган пунктларда ва улар атрофидаги 200 метр масофада амал қилади.

Фавқулодда ҳолат вақтида Литвага кириб келган ва бу ерга ўрнашган муҳожирлар ёзишмалар, телефон орқали сўзлашувлар ва бошқа алоқа воситаларидан фойдаланиш ва маълумот олиш ҳуқуқидан маҳрум этилади, давлат идоралари ва муассасаларига мурожаат қилиш имконияти бундан мустасно. Шунингдек, фавқулодда ҳолат даврида давлат захиралари маблағларидан мигрантлар оқими туфайли келиб чиқадиган жамоат тинчлигига таҳдидни бартараф этиш мақсадида фойдаланиш мумкин.

Аввалроқ Литва чегарасини қўриқлашда кучайтирилган режим жорий қилинган эди.

8 ноябрь куни эрталаб Беларусь ва Европа Иттифоқи давлатлари чегарасида вазият кескинлашди. Бу пайтда Беларусь оммавий ахборот воситалари мамлакатнинг Польша билан чегараси томонга ҳаракатланаётган муҳожирлар карвони акс этган видеоларни эълон қилди. Беларусь чегара хизмати қочқинларнинг бундай қадамига «Польша расмийларининг бефарқлиги ва ғайриинсоний муносабати» сабаб бўлганини айтди. Шу билан бирга, Минск бу одамлар қаердан келгани, бу ерга қандай етиб келганини изоҳламаган.

Беларуснинг «БелТА» давлат агентлиги хабар беришича, муҳожирлар Польша орқали Германияга ўтиб олишни мақсад қилган. Қочқинлардан бирининг нашрга айтишича, гуруҳда 1,5 мингга яқин одам бўлиб, уларнинг аксарияти курдлар. «Биз билан болалар, ҳомиладор аёллар бор, уларнинг баъзилари ҳомиладорликнинг саккизинчи ёки тўққизинчи ойида, сув, овқат, иссиқ кийим йўқ. Аммо бизга Польша чегарасини кесиб ўтишга рухсат берилмаяпти», — дейди улар. Айримлар бир неча бор чегарадан ўтишга уринган, аммо Польша ҳарбийлари уларни қайтариб юборган, дея қайд этади «БелТА».

Кейинроқ Беларусь давлат чегара қўмитаси вакили Антон Бичковский чегарада қочқинларнинг тўпланиши Польша томонининг провокацияларига олиб келиши мумкинлигини айтди. Унинг таъкидлашича, қочқинлар «атай йиғилган ва халқаро ҳамжамият эътиборини Польшанинг инсон ҳуқуқларига риоя қилмаслик борасидаги ҳаракатларига қаратишга қарор қилган». Беларусь ҳукумати қочқинларнинг чегарани бузиб ўтишга уринишида Польша ҳарбийларини айблади, польшаликлар эса руҳий босим ўтказиш учун самолётлардан фойдаланган. Бундан ташқари, Польша ҳарбийлари оломонга қарши кўзни ёшлатувчи газ ишлатган.