Грузиянинг қамоқдаги собиқ президенти Михаил Саакашвили 10 ноябрь куни бўлиб ўтадиган судда иштирок этиши керак. Бу ҳақда сиёсатчининг адвокати Бек Басилай Тбилиси шаҳар суди вакилига таяниб, маълум қилди.
«Адлия вазирлиги ва жазони ижро этиш махсус хизмати ушбу талабни (Саакашвилини суд залига олиб келишни) бажаришга мажбур», — деди Басилай журналистларга.
Грузия Адлия вазирлиги адвокатнинг суд ўтказилиш санаси ва жойи ҳақидаги баёнотига ҳозирча изоҳ бермади.
Аввалроқ мамлакат адлия вазири Рати Брегадзе унинг идораси жараённи суд залида эмас, қамоқхонада ўтказишни тавсия қилаётганини айтган. Вазирнинг сўзларига кўра, Адлия вазирлиги Саакашвилининг хавфсизлиги учун шундай таклиф бермоқда.
Саакашвили 29 сентябрь куни Грузияга яширинча кириб келган. 1 октябрь куни у Тбилисида ҳибсга олинган, шундан сўнг очлик эълон қилган. Саакашвили Рустави шаҳридаги қамоқхонага жойлаштирилган. У қўлга олингандан сўнг Грузияда мухолифатчиларнинг норозилик намойишлари бошланди, улар Саакашвили озод этилишини талаб қилди.
Грузияда сиёсатчи бир нечта жиноий ишларга алоқадор деб топилган. Илгари Грузия расмий вакиллари Саакашвали чегарани кесиб ўтиши билан ҳибсга олинишини бир неча бор таъкидлаган. Саакашвили ўзининг ҳибсга олинишини қонунга хилоф, унга қўйилган айбловларни эса сохталаштирилган, деб ҳисоблайди.
Мавзуга доир:
- Грузия Давлат хавфсизлик хизмати Саакашвили давлат тўнтаришини режалаштиряпти деб ҳисобламоқда
- Саакашвилининг адвокати очлик сабаб унинг хотирасида муаммолар пайдо бўлганини маълум қилди
- Грузия президенти ҳозирда қамоқда сақланаётган Саакашвилини ҳеч қачон афв этмаслигини маълум қилди
- «Миша, биз келдик». Саакашвилининг қайтиши ва қамоққа олиниши қандай қилиб Грузияни иккига бўлиб юборди?
Изоҳ (0)