Конго Демократик Республикаси (КДР) шимоли-шарқидаги аҳоли пунктларига номаълум қуролли шахслар томонидан уюштирилган бир қатор ҳужумлар натижасида камида 11 минг киши Угандадан бошпана олишга мажбур бўлди. Бу ҳақда Бирлашган Миллатлар Ташкилотининг Қочқинлар бўйича Олий комиссарлиги расмий вакили Шабия Манту баёнотига таяниб, «ТАСС» хабар берди.
«КДР шарқидаги жанговар ҳаракатларнинг кучайиши 11 мингга яқин одамни Угандадан бошпана излашга мажбур қилди», — деди Манту.
БМТ Қочқинлар бўйича Олий комиссарлиги вакилининг аниқлик киритишича, қочқинларнинг аксарияти аёллар ва болалардир. Уганда чегаралари COVID-19 билан боғлиқ чекловлар доирасида ёпилганига қарамай, мамлакат ҳукумати қочқинлар учун имтиёзлар яратган, деди Манту.
8 ноябрь куни бир гуруҳ жангарилар Конго қуролли кучлари позицияларига ҳужум қилиб, Шимолий Киву провинциясининг Гома шаҳри яқинидаги бир қанча қишлоқларни эгаллаб олган. КДР расмийлари ҳужумчилар «23 март ҳаракати» исёнчи гуруҳига алоқадор бўлиши мумкинлигини тахмин қилди. Ҳаракат раҳбари Бертран Бисимбва воқеага гуруҳ аъзоларининг алоқаси борлигини рад этди.
6 майдан бошлаб Шимолий Киву ва Итури провинцияларида қуролли гуруҳларнинг кучайишига қарши кураш мақсадида ҳарбий ҳолат жорий этилган.
«23 март ҳаракати» — ҳарбий-сиёсий гуруҳ, у 2012 йилнинг апрель ойида «Халқ мудофааси миллий конгресси»нинг собиқ етакчилари томонидан тузилган ва банямуленге халқи (КДР шарқида яшовчи туцилар шундай номланади) манфаатларини ифодалайди. «23 март ҳаракати» асосчилари КДР ҳукуматининг 2009 йил 23 мартдаги тинчлик келишувлари бўйича ўз мажбуриятларини бажариш тарзидан норози бўлган.
Изоҳ (0)