Грузия собиқ президенти Михаил Саакашвилини қўллаб-қувватлаш мақсадида мамлакатда ўтказилаётган норозилик намойиши иштирокчилари давлат муассасалари биноларини блоклашни режалаштирмоқда. Давлат тўнтаришини Грузиянинг қамоқда сақланаётган собиқ етачиси бошқармоқда. Бу ҳақда мамлакат Давлат хавфсизлик хизмати вакили Бача Мгеладзега таяниб, «ТАСС» хабар берди.
«2021 йилнинг 6 ноябридан бошлаб Руставидаги 12-сонли жазони ижро этиш муассасаси яқинида айрим сиёсий гуруҳлар томонидан норозилик намойишларини ўтказмоқда, бу ерга вилоятлардан партияларнинг тарафдорлари келади. Бундан ташқари, норозилик намойишини Тбилиси шаҳрида ҳам ўтказиш режалаштирилган. Тезкор маълумотларга кўра, намойиш ташкилотчилари давлат муассасаларини блоклашни режа қиляпти. Мақсади зўравонлик билан ҳокимиятни ағдариш бўлган ушбу ҳаракатлар қамоқда сақланаётган Михаил Саакашвили томонидан режалаштириляпти», — дейди Мгеладзе.
Мгеладзенинг сўзларига кўра, намойишчилар парламент, ҳукумат администрацияси, президент администрацияси, Адлия вазирлиги, ИИВ биноларини қуршаб олишни, шунингдек, Саакашвили сақланаётган Руставидаги қамоқхонага элтувчи йўлни ёпиб қўйиш ниятида. Қайд этилишича, намойишчиларга куч тузилмаларининг собиқ ходимлари келиб қўлиши, ташкилотчилар эса ўз тарафида кўпроқ амалдаги куч тузималари вакилларини жалб этишни режа қилмоқда.
Эслатиб ўтамиз, 1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди. Ҳозир у Рустави шаҳридаги қамоқхонада, у ерда ўзини сиёсий маҳбус деб ҳисоблагани учун очлик эълон қилган.
Грузия Адлия вазирлиги собиқ президентни қамоқхона касалхонасига ётқизишни бир неча бор таклиф қилган, бироқ Саакашвили ва унинг адвокатлари бунга мутлақо қарши. Улар Грузиянинг собиқ раҳбарини хусусий фуқаролик клиникасига олиб боришни талаб қилмоқда.
Изоҳ (0)