Зеленский олигархлар тўғрисидаги қонунни имзолади. Уларга сиёсий партияларни молиялаштириш ва йирик корхоналарни хусусийлаштириш тақиқланди

Украина президенти Владимир Зеленский олигархларнинг таъсирига боғлиқ миллий хавфсизликка таҳдидларнинг олдини олиш тўғрисидаги қонунни имзолади. Бу ҳақда у ўзининг Twitter’даги саҳифаси орқали маълум қилди, деб хабар беради Meduza.

Қонунда «олигарх» улкан медиа ёки сиёсий таъсирга эга, активлари қиймати минимум яшаш қиймати харажатларидан миллион марта ошган (2,5 миллиард гривен ёки 95 миллион доллар) инсон дея таърифланган. Ушбу тоифага мос келувчи шахслар махсус реестрга киритилади.

Олигархларга сиёсий партияларни молиялаштириш, шунингдек, йирик корхоналарни хусусийлаштиришда иштирок этиш тақиқланади. Амалдорлар олигархлар билан ўтказган ҳар бир учрашуви олдидан Украина Миллий хавфсизлик кенгашига хабар бериши керак.

Қонуннинг амал қилиш муддати 10 йил билан чекланган.

Зеленский мазкур қонунни Олий радага июнь бошида киритган ва у сентябрь охирида қабул қилинган эди. Қонун иккинчи ўқишга 1,3 мингта ўзгартириш таклиф этилгани ва ҳужжатнинг инсон ҳуқуқлари нормаларига мос келиши борасиаги Вене комиссиясининг хулосасига йўқлигига қарамай, тезлаштирилган тартибда қабул қилинган.

Президент олигархлар тўғрисидаги қонун лойиҳасининг киритилишини мамалкатда «олигархик тизимни йўқ қилиш» зарурати билан изоҳлаган.

Аввалроқ Зеленский Қрим ва Донбассни «Европа марказидаги экобомбалар» деб атагани, Украина президенти Россия билан уруш эҳтимоли борлигини тан олгани тўғрисида хабар берилганди.