Хитой Пентагоннинг ХХР ўзининг ядровий кучларини кучайтираётгани айтилган ҳисоботи эълон қилингани сабаб АҚШга норозилик билдирди. Бу ҳақда Хитой Мудофаа вазирлиги расмий вакили У Сян маълум қилди, деб хабар беради «РБК».
«Хитойнинг ҳарбий ривожи мутлақо миллий суверенитет ва хавфсизликни қўллаб-қувватлашга мўлжалланган. У бирор-бир мамлакатга йўналтирилмаган», — дейди Мудофаа вазирлиги вакили. Унинг сўзларига кўра, Пекин «минтақавий тинчлик, барқарорлик ва фаровонликка путур етказиш бўйича ҳар қандай уринишларни бостиради».
У Сзяннинг айтишича, Пентагон ҳисоботида «Хитойдан ҳарбий таҳдид деб аталувчи уйдирма» мавжуд. Унинг сўзларига кўра, Қўшма Штатлар Хитойни ядровий қувватини ошириш борасида асоссий айбламоқда ва мамлакат ички ишларига аралашяпти.
Хитой Мудофаа вазирлиги вакилининг қўшимча қилишича, АҚШ сўнгги йилларда «қуролли кучларнинг ядро, космик, кибернетика, гипертовушли технологиялар ва бошқа соҳаларда ривожланишини жадаллаштирган». Унинг сўзларига кўра, Қўшма Штатлар «дунёдаги энг йирик ядро арсеналига эга, аммо ядровий кучини оширишни давом этмоқда». У Сзян АҚШни «глобал ядровий хатарнинг йирик манбаси» деб атаган.
Пентагон ҳисоботи 3 ноябрь куни эълон қилинган. Унда айтилишича, Хитой 2027 йилга қадар қуролланишга 700 та ядро каллагини етказиб беришни, 2030 йилга бориб эса уларнинг сонини мингга етказишни режалаштирмоқда.
Аввалроқ Хитой АҚШни Тайван билан расмий алоқаларини зудлик билан тўхтатишга, шунингдек, совуқ уруш менталитетидан воз кечиб, ХХРга хаёлий рақиб сифатида муносабатда бўлишни бас қилишга чақирганди.
Изоҳ (0)