Грузия собиқ президенти Михаил Саакашвилининг соғлиғи ёмонлашди, унда хотираси билан боғлиқ муаммолар пайдо бўлган. Бу ҳақда унинг адвокати Ника Гварамияга таяниб, «РБК» хабар берди.
Гварамиянинг маълум қилишича, сиёсатчининг шундоқ ҳам соғлиғи билан боғлиқ жиддий муаммолари бор. «У (Саакашвили — таҳр.) одамлар исмини эслай олмаяпти. Мени эслай оляпти, аммо суҳбат давомида ҳатто баъзи дўстларининг ҳам исмини эслай олмаслиги маълум бўлди», — дейди адвокат.
Унинг қўшимча қилишича, сиёсатчи муқобил тиббий комиссия шакллантирилмагунча, шифокорлар кўригидан ўтишдан бош тортмоқда. «У шахсан менга ишонишини ва барча шифокорларни ҳурмат қилишини билдирди, бироқ унинг ҳисоблашича, мазкур шифокорлар кенгаши қайсидир даражада ҳукумат томонидан назорат қилинмоқда», — дейди Гварамия.
Эслатиб ўтамиз, 1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди. Ҳозир у Рустави шаҳридаги қамоқхонада, у ерда ўзини сиёсий маҳбус деб ҳисоблагани учун очлик эълон қилган.
Грузия Адлия вазирлиги собиқ президентни қамоқхона касалхонасига ётқизишни бир неча бор таклиф қилган, бироқ Саакашвили ва унинг адвокатлари бунга мутлақо қарши. Улар Грузиянинг собиқ раҳбарини хусусий фуқаролик клиникасига олиб боришни талаб қилмоқда.
Изоҳ (0)