Беларусь президенти Александр Лукашенкога республика Конституциясининг янги таҳрири тақдим этилди. Бу ҳақда «БелТА» ахборот агентлигига таяниб, «ТАСС» хабар берди.
«Охирги келишувларимиз ҳисобга олинган Конституциянинг сўнгги таҳририни олдим ва танишдим. Бугун биз мамлакатимиз учун қизғин ва муҳим бўлган мавзулар ҳақида суҳбатлашишга ҳаракат қиламиз», — деган Беларусь президенти Конституцияни қайта кўриб чиқиш бўйича йиғилишда.
Лукашенконинг таъкидлашича, Конституциявий комиссия «маълум ҳажмдаги ишларни амалга оширди, ўз вариантларини таклиф қилди, ҳозирда бир гуруҳ мутахассислардан иборат ишчи гуруҳ ушбу Конституцияни сайқаллаш устида ишламоқда». «Агар халқона усулда гапирадиган бўлсак, у ушбу Конституцияни қонуний тилга ўгирмоқда», — деди Лукашенко.
Президентнинг сўзларига кўра, конституцияга ўзгартиришлар тайёрлаш билан боғлиқ фундаментал масалаларни ишлаб чиқиш зарур. Улардан асосийлари — Бутун Беларусь Халқ Ассамблеясининг ролини мустаҳкамлаш, давлат ҳокимияти органлари ўртасида ваколатларни қайта тақсимлаш, давлат аппарати мувозанатини сақлаш ва бошқалар.
«Ўйлашимча, ишчи гуруҳ яна бир марта йиғилиши керак бўлади, сўнг ваъда қилганимиздек, таҳрирни Конституциявий комиссияга тақдим этамиз», — деди давлат раҳбари. Келгусида асосий қонун лойиҳасининг жамоатчилик муҳокамаси ўтказилади, Конституциянинг якуний таҳрири 2022 йил февраль ойининг охирига режалаштирилган республика референдумига киритилади.
Беларусда 2020 йил 9 августда бўлиб ўтган президентлик сайловларидан кейин бошланган норозилик намойишлари фонида Лукашенко Конституцияга ўзгартириш киритиш зарурати ва президентлик ваколатларининг бир қисмини ҳокимиятнинг бошқа тармоқлари фойдасига қайта тақсимлашга тайёрлигини маълум қилди. Конституциявий суд раиси ва Конституциявий комиссия раҳбари Петр Миклашевичнинг сўзларига кўра, асосий қонуннинг 53 моддасига ўзгартиришлар киритиш ва унга 14 та янги моддани қўшиш таклиф қилинмоқда.
Таклиф этилаётган ўзгартиришларнинг мазмун-моҳияти давлат раҳбари, парламент ва ҳукуматнинг функция ва ваколатларини белгиловчи президентлик бошқаруви шаклини сақлаб қолишдан иборат. Парламентнинг қонун чиқарувчи функциясини тўлиқ белгилаш, унинг назорат ва кадрлар ваколатларини кенгайтириш кўзда тутилган. Бундан ташқари, ҳукумат ваколатларини ва унинг ижро ҳокимияти соҳасида қарорлар қабул қилишдаги мустақиллигини кенгайтириш таклиф этилмоқда.
Мавзуга доир:
Изоҳ (0)