Lukashenkoga Belarus Konstitutsiyasining yangi tahriri taqdim etildi

Belarus prezidenti Aleksandr Lukashenkoga respublika Konstitutsiyasining yangi tahriri taqdim etildi. Bu haqda “BelTA” axborot agentligiga tayanib, “TASS” xabar berdi.

“Oxirgi kelishuvlarimiz hisobga olingan Konstitutsiyaning so‘nggi tahririni oldim va tanishdim. Bugun biz mamlakatimiz uchun qizg‘in va muhim bo‘lgan mavzular haqida suhbatlashishga harakat qilamiz”, — degan Belarus prezidenti Konstitutsiyani qayta ko‘rib chiqish bo‘yicha yig‘ilishda.

Lukashenkoning ta’kidlashicha, Konstitutsiyaviy komissiya “ma’lum hajmdagi ishlarni amalga oshirdi, o‘z variantlarini taklif qildi, hozirda bir guruh mutaxassislardan iborat ishchi guruh ushbu Konstitutsiyani sayqallash ustida ishlamoqda”. “Agar xalqona usulda gapiradigan bo‘lsak, u ushbu Konstitutsiyani qonuniy tilga o‘girmoqda”, — dedi Lukashenko.

Prezidentning so‘zlariga ko‘ra, konstitutsiyaga o‘zgartirishlar tayyorlash bilan bog‘liq fundamental masalalarni ishlab chiqish zarur. Ulardan asosiylari — Butun Belarus Xalq Assambleyasining rolini mustahkamlash, davlat hokimiyati organlari o‘rtasida vakolatlarni qayta taqsimlash, davlat apparati muvozanatini saqlash va boshqalar.

“O‘ylashimcha, ishchi guruh yana bir marta yig‘ilishi kerak bo‘ladi, so‘ng va’da qilganimizdek, tahrirni Konstitutsiyaviy komissiyaga taqdim etamiz”, — dedi davlat rahbari. Kelgusida asosiy qonun loyihasining jamoatchilik muhokamasi o‘tkaziladi, Konstitutsiyaning yakuniy tahriri 2022-yil fevral oyining oxiriga rejalashtirilgan respublika referendumiga kiritiladi.

Belarusda 2020-yil 9-avgustda bo‘lib o‘tgan prezidentlik saylovlaridan keyin boshlangan norozilik namoyishlari fonida Lukashenko Konstitutsiyaga o‘zgartirish kiritish zarurati va prezidentlik vakolatlarining bir qismini hokimiyatning boshqa tarmoqlari foydasiga qayta taqsimlashga tayyorligini ma’lum qildi. Konstitutsiyaviy sud raisi va Konstitutsiyaviy komissiya rahbari Petr Miklashevichning so‘zlariga ko‘ra, asosiy qonunning 53 moddasiga o‘zgartirishlar kiritish va unga 14 ta yangi moddani qo‘shish taklif qilinmoqda.

Taklif etilayotgan o‘zgartirishlarning mazmun-mohiyati davlat rahbari, parlament va hukumatning funksiya va vakolatlarini belgilovchi prezidentlik boshqaruvi shaklini saqlab qolishdan iborat. Parlamentning qonun chiqaruvchi funksiyasini to‘liq belgilash, uning nazorat va kadrlar vakolatlarini kengaytirish ko‘zda tutilgan. Bundan tashqari, hukumat vakolatlarini va uning ijro hokimiyati sohasida qarorlar qabul qilishdagi mustaqilligini kengaytirish taklif etilmoqda.