Шоҳруҳ Хон 56 ёшда: Болливуд қироли иштирокидаги энг муваффақиятли фильмлар (видео)

Шоҳруҳ Хон ижросидаги фильмни томоша қилмаган, ундаги қўшиқларни қўшилиб хиргойи қилмаган томошабинни ҳинд фильмлари мухлиси деб атаб бўлмайди.

2 ноябрь куни «Болливуд қироли» 56 ёшни қаршилади. Карьерасини 1992 йил «Девона» фильмидаги ижродан бошлаган актёр, 30 йиллик фаолияти давомида дунёнинг турли бурчагидан мухлис орттиришга, миллионлаб томошабинлар қалбини забт этишга муваффақ бўлган. 55 ёшга тўлганида дубайлик мухлислари шаҳардаги Бурж Халифа осмонўпар биноси орқали унга табрик йўллагани бунинг яна бир исботи.

Ёши ўтаётган бўлса ҳам буюклигини йўқотмаган, Баччан ва Чакраборти ўйнаган ҳинд фильмлари ва ёш авлод ўртасидаги давр актёри ҳисобланган ижодкор, 1965 йил адвокатлар оиласида дунёга келган. Молия соҳасида бакалавр дипломини қўлга киритган актёр, фильмда суратга тушишга Бомбейга кўчиб келганидан кейингина қарор қилган. Ҳема Малини билан бирга рол ижро қилиш ҳақида шартнома имзолаганига қарамай, иштирокидаги «Девона» фильми биринчи бўлиб экран юзини кўради ва айнан мазкур лойиҳадаги роли сабаб Filmfare мукофотини қўлга киритади.

Молиявий аҳволи 687 миллион долларга баҳоланадиган актёр, Filmfare мукофотини қўлга киритиш бўйича рекордсмен ҳисобланади. Туғилган куни муносабати билан ҳар бир роли хитга айланган Шоҳруҳ Хоннинг карьераси давомидаги энг яхши фильмлари ҳақида эслаймиз.

«Ўғирланмаган келин»

Катта давлатларда ҳам кичик кўнгилсизликлар бўлиб туради

Рўйхатни «Ўғирланмаган келин» фильми бошлаб беради. Чунки айнан мазкур мелодрама энг яхши романтик ҳинд фильмларидан бири саналади. Режиссёр Адитя Чопранинг дебют иши нафақат Шоҳруҳнинг карьерасида янги босқични бошлаб берган, балки уни романтик фильмлар қиролига айланишига ҳам сабабчи бўлган. Режиссёр мухлислар Ражни романтик ижрода кўриниши кутилмаган актёр гавдалантиришини истаган. Бу вақтда Шоҳруҳ Хон арсеналида «ёмон йигит» роллари бўлган ва Адитя уни бошқача образда оммага кўрсатиб, ҳайрон қолдириши мумкинлигини билган. Бутун дунёда машҳурликка эришган мазкур фильм Filmfare Awards’нинг 41-тақдирлаш маросимида 14 номинация ва 10 мукофотни қўлга киритган. Фильмнинг нафақат қўшиқлари, балки иқтибослари ҳам ёд бўлиб кетган.

Сюжетга кўра, ўз орзулари оламида яшайдиган ҳинд қизи Симраннинг ҳаёти Европага қилган саёҳатидан кейин буткул ўзгариб кетади. Шоҳруҳ Хон мазкур фильмда севгисига эришиш учун курашадиган ва бунинг учун қизнинг ота-онаси қалбидан жой олишга уринадиган қаҳрамонни гавдалантиради.

«Ўткинчи дунё»

Яша, кул, бахтли бўл... Ким билади, эрта келадими, йўқми…

«Ўткинчи дунё» фильми 2003 йилда Нью-Йоркда суратга олинган. Сюжетнинг таъсирчанлиги, актёрларнинг маҳорати ва фильм орқали томошабинга етказилган ғоянинг долзарблиги сабаб орадан салкам 20 йил ўтган бўлса ҳам фильм қайта-қайта томоша қилинади. Шоҳруҳ Хоннинг фильмдаги ролдан қуруқ қолиши ҳам мумкин эди. Суратга олиш жараёнининг бешинчи кунида актёр Каран Жоҳарга телефон қилиб, касал бўлиб қолгани сабаб суратга тушишда давом этолмаслигини билдирган. Бунга жавобан Никҳил Каран Жоҳардан Шоҳруҳ Хон тузалгунича кутиб туришни сўраган. Суратга олиш жамоаси Болливуд қиролининг буткул тузалишини 6 ой кутган.

Сюжетга кўра, актёр гавдалантирган қаҳрамон, Нейна исмли қиз ва унинг оила аъзолари ҳаётига мўъжизадек кириб келади. Ўзини тутиши, ҳазилкашлиги ва ғамхўрлиги билан барчанинг, хусусан, Принти гавдалантирган қизнинг ҳам қалбидан жой олади. Ўз навбатида бола ҳам қизга бефарқ бўлмайди, аммо умри тугаб бораётгани сабаб туйғуларини яширишга, бу ҳам етмагандек Нейнани яқин дўсти Роҳитга унаштиришга мажбур бўлади. Турли эмоцияларни ҳис қилишга сабаб бўладиган фильмда Шоҳруҳ Хон гавдалантирган актёр вафот этади.

«Девдас»

Сен аёлсан Чандрамукҳи. Ўзлигингни топ. Аёл бу она, сингил, завжа, дўст акс ҳолда эса у фоҳишага айланади. Сен бир оилани гуллатишинг мумкин Чандрамукҳи

Ҳинд кинематографиясида алоҳида ўринга эга бўлган «Девдас» фильми 2002 йилда суратга олинган. Сюжетга кўра, актёр гавдалантирган қаҳрамон, бойлик инсон ҳаётидан кўра кўпроқ қадрланадиган одамлар сабаб бирга ўйнаб катта Пародан ажралишга мажбур бўлади.

Турли табақага мансуб оилалар, фарзандларининг ҳаёти никоҳ ришталари билан боғланишига қаршилик қилади. Лондонга ўқиш учун кетган Девдаснинг ҳаёти ортга қайтганидан кейин ўзгариб кетади. Санжай Лила Бхансалининг «Оскар» мукофоти учун илгари сурилган мазкур фильми нафақат Шоҳруҳ Хон, балки Айшвария Рай ижодидаги энг яхши лойиҳалардан саналади.

«Гоҳи шодлик, гоҳи ғам»

Ҳаётда бирор мақсадни кўзлаб, унга эришмоқчи бўлсанг, орзунгга етмоқчи бўлсанг, қалбингга қулоқ сол. Жавоб тополмасанг, кўзингни юмгин-да, ота-онангни кўз олдингга келтир

Каран Жоҳар режиссёрлигида Амитабҳ Баччан, Жая Баччан, Шоҳруҳ Хон, Кажол, Ритик Рошан ва Карина Капур иштирок этган фильм 2001 йилда суратга олинган. Сюжетга кўра, бадавлат тадбиркор ўз рафиқаси билан Рахул исмли болани асраб олади. Тўққиз йилдан кейин уларнинг ўзи ҳам фарзандли бўлади — унга Роҳан деб исм қўйилади.

Шоҳруҳ Хон ижросидаги тўнғич ўғил камбағал қизга кўнгил қўяди ва ота-онасидан яширинча унга уйланади. У ушбу қилмиши билан дўстининг қизини келин қилмоқчи бўлган отанинг режасини чиппакка чиқаради. Рахулдан ранжиган отаси уни меросдан маҳрум қилиб, уйдан ҳайдайди. У рафиқаси билан Лондонга кетади. Роҳан отаси ва акаси ўртасидаги зиддиятни бартараф этиш учун қўлидан келган ҳамма ишни қилади.

«Вир ва Зара»

Мен маҳбус етти юз саксон олтинчи, қамоқ дарчасидан маъюс боқаман

2004 йилда режиссёр Яш Чопра томонидан суратга олинган фильмда Шоҳруҳ Хон покистонлик қиз Зарани севиб қолади. Қиз отасининг гапидан чиқа олмагани сабаб у айтган одамга турмушга чиқишга мажбур бўлади. Шундан кейин Вирнинг ортга қайтишига тўғри келади. Аммо у жосусликда айбланиб, Покистондаги қамоқхонага олиб кетилади.

Тақдир тақозоси билан озодликдан маҳрум бўлган қаҳрамоннинг «Мен — маҳбус 786» монологи аксарият мухлисларга яхши таниш. Қизиғи, мазкур монологни битта дублнинг ўзида ижро қила олган.

«Менинг исмим Хон»

 

Менинг исмин Хон ва мен террорчи эмасман

2010 йилда суратга олинган фильм турли дин вакиллари ўртасидаги низолар ҳаётни қанчалик мураккаблаштириши ҳақида ҳикоя қилади. Ҳиндистонлик Ризвон Хон оила қуриб, ишлаш мақсадида Америкага жўнаб кетади. Аспергер синдромидан азият чекадиган қаҳрамонга аксарият одамлар ғалати нигоҳ билан қарайди, аммо касаллиги севгисини топишга тўсиқ бўла олмайди. 2001 йилдаги терактдан сўнг Америкада мусулмонларга бўлган муносабатнинг кескин ўзгариши фильмда ўз аксини топади.

Шоҳруҳ Хоннинг Кажол билан бу сафарги ҳамкорлиги ҳам «Ўғирланмаган келин, «Ҳаётда ҳамма нарса бўлади», «Гоҳи шодлик, гоҳи ғам» сингари муваффақиятли чиққан.

«Ҳаётда ҳамма нарса бўлади»

Она бу бизни шу қадар севадиган зотки, вақти келса ҳатто ўзимиз ҳам у муҳаббатнинг қадрига етмаймиз. Она бу биздан яхши инсон дунёда йўқ деб айтувчи зотдир. Она бу бизни хурсандчиликга суюнадиган хафа бўлсак куюнадиган зот

Каран Жоҳарнинг «Ҳаётда ҳамма нарса бўлади» фильми 1998 йил суратга олинган. Ундаги воқеалар ривожи дўстлик ва севги каби инсоний ришталар бир-бирга чамбарчас боғлиқ эканига асосланади.

Раҳул ва Анжели коллежда қадрдон дўст бўлсалар-да, уларнинг ҳаётида Тина исмли қизнинг пайдо бўлиши барчасини ўзгартириб юборади.