Актёрларнинг гонорари бир неча омиллар: машҳурлик, тажрибаси, қўлга киритилган мукофот ва бошқаларга боғлиқ бўлади. Ушбу рўйхат қанчалик тўла бўлса, тўланадиган маблағ ҳам шунча кўп бўлади.
Крис Хемсворт ва Энтони Ҳопкинс «Тор»
Тор ҳақидаги илк фильм прокатларда 449,3 миллион доллар йиғиб, 2011 йилнинг энг кассабоп ленталари рейтингида 15-ўринни эгаллаган. Бош қаҳрамоннинг отаси ролини Голливуд юлдузи Энтони Ҳопкинс гавдалантирган. У мазкур лойиҳада иштирок этиш учун одатий оладиган гонораридан икки карра кам нархга — 10 миллион долларга рози бўлган. Шундай бўлса-да, у суратга олиш майдончасидаги энг кўп ҳақ тўланган актёр бўлиб қолган. Ҳали юлдуз бўлиб улгурмаган Крисга эса бош қаҳрамонни гавдалантирганига қарамай, 150 минг доллар берилган холос.
Жиллиан Андерсон ва Дэвид Духовни «Махфий материаллар»
«Махфий материаллар» сериали унда бош қаҳрамон сифатида суратга тушган Жиллиан Андерсон ва Дэвид Духовнига оламшумул машҳурлик олиб келган. Улар жуфтлик сифатида рол ижро қилганига қарамай, ҳар иккисига турли гонорар тўланган. Тўртинчи мавсумга қадар актрисага, унинг ҳамкасбидан кўра икки карра кам маблағ тўланган. Меҳнатига тенг ҳақ тўланишига эришиш учун аёлга уч йил керак бўлган.
Люси Лю, Дрю Берримор, Камерон Диас «Чарли фаришталари»
«Чарли фаришталари» фильми прокатда 274,1 миллион маблағ тўплаб 2000 йилнинг энг кассабоп киноленталаридан бири бўлган. Мухлисларга Диас, Берримор ва Льюнинг триоси шунчалик ёққани туфайли орадан 3 йил ўтиб картинанинг сиквели суратга олинган. Актрисаларнинг экранда кўриниш вақти бир хил тақсимланганига қарамай, берилган гонорар миқдори турлича бўлган. Кемеронга 12 миллион, Дрюига 9 миллион, Льюсига эса ҳаммадан кам 1 миллион кам берилган.
Анжелина Жоли ва Брэд Питт «Жаноб ва хоним Смит»
«Жаноб ва хоним Смит» фильми Анжелина ва Брэд ўртасида муносабатлар авж олишининг бошланғич нуқтаси бўлган. Берилган гонорар миқдори ўртасидаги фарқ уларнинг ўртасида севги алангаси пайдо бўлишига тўсқинлик қилмаган. Картина экран юзини кўрганидан кейин Питт 20 миллион долларга эга бўлган. Жоли эса бўлажак турмуш ўртоғидан икки карра кам маблағ билан чекланган.
Миа Васиковска ва Жонни Депп «Алиса мўъжизалар мамлакатида»
Миа Васиковска иштирокидаги фильмлар аксарият ҳолларда кассабоп бўлади. У суратга тушган лойиҳалар жами 1,03 миллиард доллар маблағ тўплаган. Шунга қарамай, унга унчалик катта бўлмаган миқдорда гонорар — ўртача бир фильм учун 250 минг доллар тўланади. «Алиса мўъжизалар мамлакатида» фильми ҳам истисно бўлмаган. Жоннига шляпа кийган қаҳрамонни гавдалантиргани учун 10 354 778 доллар тўланган бир вақтда, Миага миллион долларнинг тўртдан бир қисми берилган
Сем Уортингтон, Зои Салдана ва Сигурни Уивер «Аватар»
«Аватар» прокатда рекорд даражада 2,787 миллиард доллар тўплаган. Аммо шунга қарамай, унда суратга тушган актёрлар Сем Уортингтон ва Зои Салданега унча кўп бўлмаган гонорар тўлаган. Аммо Грэйс Огустинни гавдалантирган Сигурни Уивердан пул аялмаган. Актриса иккинчи даражали актриса сифатида кўриниш берганига қарамай, 11 миллион долларни қўлга киритган.
Генри Кавилл ва Эми Адамас «Пўлат одам»
Генри Кавиллага «Пўлат одам» фильми учун тахминан 300 минг доллар гонорар тўланган. Гап шундаки, одатда суперқаҳрамонлар ҳақидаги франшизаларда илк бор арзигулик ролини ижро қилаётганларга шунча миқдорда пул берилади. Унинг ҳамкасби Эми Адамсга шу лойиҳадаги иштироки учун кўпроқ тўланган. Бунга актрисанинг бир неча марта «Оскар»га номзод бўлиб улгургани сабаб бўлгандир, яна ким билсин.
Майкл Китон ва Жек Николсон «Бетмен»
«Бетмен» фильмида Жокер ролини ўйнаши учун Жек Николсанга, унинг даражаси учун сезиларли даражада кам сумма — 6 миллион доллар таклиф қилинган. У суратга тушишга бир шарт — кассада йиғилган маблағнинг фоизини олиш эвазига рози бўлган. Натижада Николсан ушбу картина ортидан 50 миллион доллардан кўпроқ даромадга эга бўлган. Бош қаҳрамон ролини ижро қилган Майкл Китоннинг эса 5 миллион долларга кўнишдан бошқа иложи қолмаган.
Жессика Честейн ва Мэтт Деймон «Марс тутқуни»
Оскарга 7 карра номзод бўлган «Марс тутқуни» 2015 йилнинг энг муҳокама қилинган фильмларидан бўлган. Актрисага бу фильмдаги иштироки учун тахминан 1,75 миллион доллар тўланган. Ҳамкасби Мэтт эса мазкур лойиҳадаги роли учун 15 миллион долларга эга бўлган.
Том Ҳолланд ва кичик Роберт Дауни «Ўргимчак-одам: уйга қайтиш»
«Ўргимчак-одам: уйга қайтиш» картинаси дунё прокатида 880 миллион доллар тўплаган. Шундан 15 миллиони Робертга гонорар тўлаш учун сарфланган. Қизиғи, актёр экранда атиги 15 дақиқага яқин кўриниш берган ва ҳисоблаб кўрилса, ҳар 1 дақиқа учун 1 миллион долларга эга бўлган. Бош қаҳрамонни гавдалантирган Том Ҳолланд эса базавий гонорар сифатида 500 минг доллар олган. Бонуслар билан ҳисоблагандаги умумий тўланган маблағ эса 1,5 миллионни ташкил қилган.
Мавзуга доир:
Изоҳ (0)