«Туташ тақдирлар» сериалидаги Раъно образи билан томошабинлар меҳрини қозонган актриса ҳозир қаерда? (фото)

2009 йил экран юзини кўрган «Туташ тақдирлар» сериали ўз даврининг энг шов-шувли лойиҳаси бўлганди. Режиссёр Замира Бегимқулованинг мазкур сериалида раққоса қиз Раъно ролини ижро этган дебютант Нафиса Мамадиёрова ҳам томошабинлар меҳрини қозонганди. Лекин актриса сериалдаги муваффақиятли иштирокидан сўнг кўринмай кетди. Журналист Наргиза Муродова Нафиса Мамадиёрова билан суҳбатда бўлиб, кўпчиликни қизиқтирган саволларга жавоб олди.

«Санъатни тарк этганим йўқ»

—  «Туташ тақдирлар» сериали оммага тақдим этилгач, турмушга чиқдим. Ундан кейин ҳам бир-икки марта ролларга таклиф этишди. Аммо оилавий шароитим сабаб уларни рад этдим. Чунки турмушга чиққан аёлнинг ўзига яраша ширин ташвишлари кўп бўлади. Агар «декрет» таътилларини инобатга олмаса, ижодни тўхтатмаганман. Шунчаки бор эътиборимни ўз касбим — раққосаликка қаратганман.

«Сериалда суратга тушишни истамагандим»

— «Туташ тақдирлар» сериалида рол ижро этишим жуда қизиқ кечган. Ҳамма қизлар сериалда суратга тушишга интилса, мен бирор марта ҳам орзу қилмаганман. Фарғона давлат санъат билим юртини битириб, Ўзбекистон Қуролли кучлар ансамблида раққоса бўлиб ишлардим. Бир куни устозим Зиёда Мадраҳимованинг олдига режиссёр Замира Бегимқулова келиб, рол учун раққоса қиз излаётганини айтибди. Шунда устозим «Майли, қизларни кўринг, мос келганини айтарсиз», дебди. Замира опа анча вақт машғулотимизни кўриб, кейин Зиёда Мадраҳимовага менинг ташқи кўринишим маъқул келганини айтибди. Зиёда опа кулиб, «Мен ҳам сизга Нафисани тавсия қилмоқчи эдим», дебди. Рости, сериалда суратга тушишни умуман истамадим. Шунда устозим, «Мен ёнингда бўламан, раққоса қизнинг ички кечинмаларини очиб беришинг керак», деб тушунтиргандан кейин ролга рози бўлдим.

— Съёмка куни яқинлашган сари ҳаяжоним ортган. Чунки ўзимни ролда умуман тасаввур қилолмаганман. Замира Бегимқуловага «Нега мени танладингиз, сизни уялтириб қўйишдан қўрқяпман», деганимда «Қаҳрамоним худди сендек содда қиз, ташқи кўринишингнинг ўзи рол муваффақиятини таъминлайди», деганди. Суратга олиш жараёнлари осон кечмаган. Ҳаётда отасиз ўсганим учун ота билан қиз ўртасида қандай муносабат бўлишини билмасдим. Шу боис марҳум санъаткор Ҳошим Арслоновни бироз қийнаб қўйганман. Кейин йиғлаш саҳналари қайта-қайта суратга олинишига тўғри келган.

«Ҳарбий инсонга турмушга чиқдим»

— Турмуш ўртоғим Аъзамжон ака ҳарбий бўлса-да, санъатни ҳурмат қилади. У инсон билан сериал суратга олинмасидан аввал танишганмиз. Муносабатларимиз жиддий бўлгани учун «Сериалга таклиф этишяпти, суратга тушсам қарши эмасмисиз?» деб розилигини олганман. Аммо сериал эфирга берилганда рашк қилган пайтлари ҳам кўп бўлган. Айниқса, томошабинлар тасодифан «Ферузбекка узукка кўз қўйгандек моссиз» дейишса, роса хижолат бўлардим. Қайнанам сериалдаги ролимни кўриб ёқтириб қолган. Баъзилар «Қайнанангиз фаолиятингизга қарши бўлмайдими?» деб кўп сўрашади. Бахтим шундаки, қайнанам санъацевар инсон. Ижод қилишим учун мендан ҳам кўпроқ қайғуради.

Нафиса Мамадиёрова ҳозирги сериалларни кузатасизми ва режиссёрлар рол таклиф этилса, қабул қиласизми, деган саволимизга қуйидагича жавоб берди.

«Ростини айтсам, ҳозирги сериалларни умуман кузатмайман. Сабаби мен ишлайдиган ансамблда концерт дастурлари ва гастрол сафарлари ниҳоятда кўп. Ишдан келгач, ҳамма аёллар қатори уй ишлари билан бўлиб, сериал кўришга вақт топмайман. Илгари фарзандларим кичиклиги учун ролларни рад этгандим. Энди таклифлар бўлса, ўйлаб кўришим мумкин. Фақат рол раққосалик фаолиятимга яқин бўлиши керак. Ўғлим Исломбек 10 ёшда, қизим Рухсора 5 ёшда. Демак, энди сериалга суратга тушиш ҳақида ўйлаб кўрсам бўлади».

Нафиса Мамадиёрова ижтимоий тармоқларда нима сабабдан фаол эмаслиги ва ташқи кўринишининг ўзгармаслиги сири билан ҳам ўртоқлашди.

—Деярли интернетдан фойдаланмайман. Онда-сонда Telegram’даги хабарларга кўз югуртириб қўяман, холос. Қолган бирорта ижтимоий тармоқдан фойдаланишга зарурат сезмайман. Менимча, интернет вақтни ўғирлаб қўяди. Ҳаётда оддийликни яхши кўраман, гўзаллик салонига ҳам деярли бормайман. Худо берган гўзалликни ўзгартиришни истамайман. Балки ўзгармаслигимнинг сири шундадир.

Маълумот учун: Нафиса Мамадиёрова (Раҳматова) 1986 йил Фарғона шаҳрида дунёга келган. Оилада икки қизнинг кенжаси. 2010 йил Аъзамжон Мамадиёров билан оила қурган.