Украина бош вазирининг ўринбосари, вақтинча босиб олинган ҳудудларни реинтеграция қилиш вазири Алексей Резников истеъфога чиқиш тўғрисида ариза берди. Бу ҳақда Олий Рададаги Вазирлар Маҳкамаси вакили Тарас Мельничукга таяниб, «РБК» хабар берди.
«Ҳукумат аъзоси – Украина бош вазирининг ўринбосари – Украинанинг вақтинча босиб олинган ҳудудларини реинтеграция қилиш вазири Резников А.Й. ўз хоҳиши билан истеъфога чиқиш тўғрисида ариза берди. Ариза Олий Рада аппаратида рўйхатга олинди», — деб ёзди Мельничук ўзининг Telegram каналида.
Аввалроқ «Украина ҳақиқати» манбалари Украина Вазирлар Маҳкамасида кадрлар ўзгариши кутилаётгани ҳақида хабар берган. Уларга кўра, Резников Андрей Тараннинг ўрнига мудофаа вазири этиб тайинланади. Ўз навбатида, бош вазир ўринбосари лавозимини «Халқ хизматкори» депутати Ирина Верешчук эгаллайди.
«Халқ хизматкори» фракциясининг раҳбари Давид Арахамиянинг сўзларига кўра, Таран соғлиғидаги муаммолар ва тезкор ислоҳотлар ўтказиш зарурати туфайли мудофаа вазири лавозимини Резниковга топширади.
«Жаноб Резников учун, менимча, мудофаа таъминоти соҳасидаги қоидалар сезиларли даражада ўзгарганини ҳамма тушунади. Мудофаа вазирлиги эса кескин ўзгаришларга муҳтож. Жаноб Таран билан келишилган ҳолда, унинг соғлиғи, қолаверса, Мудофаа вазирлиги турбо режимига муҳтож бўлгани сабабли, бу ўзгаришларнинг барчасига раҳбарлик қила оладиган тажрибали раҳбар излашга тўғри келди. Аслида, Резников ўзининг профессионаллиги, дипломатиясини аллақачон исботлаб бўлган ва халқаро ҳамкорлар орасида обрў-эътиборга эга», — деди Арахамия.
Бундан ташқари, Вазирлар Маҳкамаси таркибига ҳам бир қатор ўзгаришлар киритилиши режалаштирилган. Хусусан, экология вазири Роман Абрамовскийнинг ўрнини унинг ўринбосари Руслан Стрелетс, бош вазирнинг яна бир ўринбосари Олег Урускийнинг ўрнини эса Давлат божхона хизмати раҳбари Павель Рябикин эгаллайди, дея хабар берди «Украина ҳақиқати» манбалари.
Резников «РБК Украина»га истеъфога чиққанини тасдиқлади. Нашр унинг баёноти нусхасини олди. Кейинчалик Мельничук Уруский ҳам истеъфога чиқиш ҳақида ариза ёзганини маълум қилди.
Резников 2020 йилнинг март ойида бош вазир ўринбосари – Украинанинг вақтинча босиб олинган ҳудудларини реинтеграция қилиш вазири этиб тайинланган эди. Россия Давлат Думаси уни қидирувга беришни талаб қилган. Бунга вазирнинг Қримга Украина назорат пунктлари орқали кўчиб ўтмаган россиялик, агар ярим орол Украинага қайтса, депортация қилиниши ҳақидаги сўзлари сабаб бўлган. Бундай шахслар қонунбузарлар саналади ва «қувиб чиқарилиши» мумкин, деган у.
Қрим республикаси сенатори, Федерация Кенгашининг халқаро ишлар бўйича қўмитаси аъзоси Сергей Секов Резниковнинг сўзларига изоҳ берар экан, «Украинадаги ва хориждаги барча ақли расо одамлар бу (депортация) ҳеч қачон содир бўлмаслигини тушунади», — деди. Унинг таъкидлашича, етти йил ичида 300 мингдан кўпроқ одам, шу жумладан, 100 мингга яқин Украина фуқаролари Қримга кўчиб ўтган ва Резников «бу ҳақда билмайди». «У жиддий ўринбосар, лекин бемаъни гапларни айтади», — дея қўшимча қилган Секов.
Изоҳ (0)