Gruziyada muxolifatchi fraksiya Saakashvilining sog‘lig‘i tufayli parlamentga boykot e’lon qildi

Gruziyaning “Lelo – Gruziya uchun hamkorlik” muxolifatchi fraksiyasi parlament ishini boykot qiladi va mamlakat rasmiylaridan qamoqxonada ochlik e’lon qilgan sobiq prezident Mixail Saakashvilining “sog‘lig‘i haqida yetarlicha qayg‘urishni” talab qiladi. Bu haqda fraksiya a’zosi Salome Samadashvili brifingda ma’lum qildi, deb yozmoqda “TASS”.

“Lelo – Gruziya uchun hamkorlik’ fraksiyasi konstitutsiya va parlament tomonidan bizga berilgan huquqdan foydalanib, shuni ma’lum qiladiki, rasmiylar Mixail Saakashvilining sog‘lig‘i haqida yetarli darajada g‘amxo‘rlik qilib, uning hayotiga tahdid solishi mumkin bo‘lgan barcha xavf-xatarlarni bartaraf etmaguncha, parlamentning yalpi majlislarida qatnashmaymiz”, — dedi Samadashvili.

1-noyabr kuni Saakashvili o‘zi asos solgan “Yagona milliy harakat” partiyasi deputatlariga murojaat qilib, ularni mandatlaridan voz kechishga va parlamentni tark etishga chaqirgan. Deputatlar Anna Sitlidze va Nona Mamulashvili bu chaqiriqni bajarishga tayyor ekanini e’lon qildi, biroq ular hali parlamentga deputatlik vakolatlaridan mahrum qilish iltimosi bilan rasman murojaat qilmadi.

“Lelo – Gruziya uchun hamkorlik” fraksiyasi Gruziya parlamentida 150 o‘rinli yettita, “Yagona milliy harakat” esa 31 ta mandatga ega. Hukmron “Gruziya orzusi – Demokratik Gruziya” partiyasi eng katta fraksiya bo‘lib, 84 nafar deputatga ega.

Eslatib o‘tamiz, 1-oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. Hozir u Rustavi shahridagi qamoqxonada, u yerda o‘zini siyosiy mahbus deb hisoblagani uchun ochlik e’lon qilgan.

Gruziya Adliya vazirligi sobiq prezidentni qamoqxona kasalxonasiga yotqizishni bir necha bor taklif qilgan, biroq Saakashvili va uning advokatlari bunga mutlaqo qarshi. Ular Gruziyaning sobiq rahbarini xususiy fuqarolik klinikasiga olib borishni talab qilmoqda.