«Давлат хизматлари кўрсатишнинг инфратузилмаси такомиллаштирилганлиги ва аҳолининг давлат хизматларидан фойдаланиш имкониятлари кенгайтирилганлиги муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида» Вазирлар Маҳкамаси қарори қабул қилинди, деб хабар беради Telegram’даги «Ҳуқуқий ахборот» канали.
Қарор билан бир қатор давлат хизматлари кўрсатишдаги тўлов миқдорлари камайтирилган.
Жумладан, чет тилини билиш даражаси тўғрисида малака сертификатининг дубликати берилганлиги учун БҲМнинг 10 фоизи миқдорида (27 минг сўм) тўлов ундирилиши белгиланди (илгари БҲМнинг 50 фоизи).
Қарор 2021 йил 1 декабрдан бошлаб кучга киради.
Аввалроқ Ўзбекистонда давлат хизматларини кўрсатиш кечиктирилганда 50 фоиз чегирма қўлланилиши маълум бўлганди. Президент фармонига кўра, 2021 йил 1 ноябрдан «Ижтимоий ҳимоя ягона реестри» ахборот тизимида рўйхатга олинган шахсларга, шунингдек, I ва II гуруҳ ногиронлиги бўлган шахсларга давлат хизматлари марказлари ва (ёки) Ягона интерактив давлат хизматлари портали (ЯИДХП) орқали давлат хизматларини кўрсатишда давлат божлари, йиғимлар ва бошқа ҳар қандай тўловлар бўйича 50 фоиз миқдорида чегирма қўлланилади (тадбиркорлик фаолияти мақсадларида ёки юридик шахслар вакили сифатида мурожаат қилинган ҳолатлар бундан мустасно).
Изоҳ (0)