Афғонистонда «Толибон» ҳаракати ҳокимиятни қўлга киритганидан бери журналистларга нисбатан 30 дан ортиқ зўравонлик ҳолати қайд этилган. Бу ҳақда Афғонистон Журналистлари миллий иттифоқи раҳбари Масрур Луфти маълум қилди, деб ёзади TOLOnews.
Луфтининг сўзларига кўра, 90 фоиз ҳолларда журналистлар «Толибон» тазйиқига учраган. Иттифоқ аъзоларининг аксарияти «Толибон» томонидан фаолиятига тақиқ қўйилган афғон оммавий ахборот воситалари ходимларининг ҳолидан хавотир билдирди, шунингдек, «Толибон»нинг мунтазам чекловлари туфайли маълумотлардан фойдаланишда қийинчиликлар юзага келаётганини қайд этди. Улар «Толибон» ҳукумати расмийларини журналистлар хавфсизлигини таъминлашга чақирди.
Афғонистон Ички ишлар вазирлиги матбуот котиби Сайид Хостининг ишонтириб айтишича, «Толибон» журналистлар хавфсизлигини таъминлашга ҳаракат қилмоқда, бир қатор ҳолларда уларга нисбатан ноқонуний хатти-ҳаракатлар содир этган шахслар ҳибсга олинган.
15 август куни «Толибон» Афғонистонни эгаллаб олгач, матбуот ва аёллар учун ўз шартларини эълон қилди. Унга кўра, «Толибон» ҳукмронлиги даврида журналистлар ҳодисаларни танқид қилиши мумкин бўлади. Шу билан бирга БМТ августда Афғонистоннинг «Толибон» томонидан эгаллаб олинган ҳудудларида аёллар, ҳуқуқ ҳимоячилари ва журналистларнинг оммавий ўлдирилиши ҳолатлари ҳақида маълум қилганди.
Август охирида Афғонистонлик журналистлар БМТга мактуб йўллаб уларнинг хавфсизлигини таъминлашга чақирди.
Изоҳ (0)