Қашқадарё вилоятида иситиш мосламаларидан келиб чиққан ёнғин оқибатида Косон туманида 61 ёшли фуқаро, Чироқчида эса бир ёшли чақалоқ вафот этган. Бу ҳақда Қарши шаҳридаги Журналистлар уйида бўлиб ўтган матбуот анжуманида вилоят Фавқулодда вазиятлар бошқармаси бошлиғи Фарҳод Мирзаев маълум қилди, дея хабар берди «Дарё» мухбири.
Матбуот анжуманида таъкидланишича, вилоятда 2021 йилнинг ўтган тўққиз ойи мобайнида 709 та ёнғин келиб чиққан бўлиб, ёнғинлар натижасида 5 нафар фуқаро вафот этган. 29 нафар фуқаро эса куйиш тан жароҳатини олган.
«Содир бўлган ёнғинларнинг 533 таси, яъни 75 фоизи аҳоли турар жойларига тўғри келган бўлиб, шулардан 129 таси электр ускуналаридан фойдаланиш қоидаларини бузиш натижасида, 35 таси қасддан ўт қўйиш натижасида, 279 таси очиқ оловдан эҳтиётсизлик билан фойдаланиш оқибатида, 47 таси эса иситиш печларини қуриш ва ишлатиш қоидаларини бузиш ва 112 таси болалар шўхлиги оқибатида келиб чиққани маълум бўлди. Мазкур ёнғинлар келтирган зарар эса салкам 4 миллиард сўмни ташкил қилди», — дейди вилоят Фавқулодда вазиятлар бошқармаси бошлиғи Фарҳод Мирзаев.
Фарҳод Мирзаевнинг маълумот беришича, 2021 йилнинг 21 январь куни Косон туманида яшовчи 1960 йилда туғилган фуқаро О. уйидаги иситиш печини нотўғри ёқиши, яъни газ баллондан чиққан суюқликни печга солиб ёқиши оқибатида келиб чиққан ёнғин оқибатида 60—65 фоиз куйиб вафот этган бўлса, 2021 йилнинг 10 апрель куни Чироқчи туманида яшовчи фуқаро хонадонида бир нечта электр печларнинг уланиши оқибатида электр ускуналарнинг зўриқишидан келиб чиққан ёнғинда фуқаронинг бешикдаги бир ёшли фарзанди юз фоиз куйиб, вафот этган.
Изоҳ (0)