2021-yilning aprelida Toshkent viloyati Nurafshon shahridagi ikki qavatli uyda gaz portlashi natijasida bir kishi halok bo‘lgandi. MY5 telekanalining “Markaziy studiya” axborot dasturida ma’lum qilinishicha, portlashga sababchi bo‘lgan fuqaroga nisbatan sud hukmi o‘qilgan.
Foto: FVV matbuot xizmati
Avvalroq portlash sodir bo‘lgan xonadonda “Hududgaz Toshkent” gaz ta’minoti filiali xodimlari ish olib borgan. O‘rganishlar jarayonida maishiy ehtiyoj uchun tabiiy gazni o‘g‘irlash natijasida 2 qavatli binodagi uylardan birining xonasida tabiiy gaz to‘planishi sodir bo‘lgani aniqlangan. Xonadon egasi hisoblagichni olib tashlab, gaz quvurlarini kanalizatsiya sifoni orqali ulab qo‘yishi tabiiy gaz sizib chiqishiga sabab bo‘lgan.
Marhumning onasini so‘zlariga ko‘ra, qulagan plitani ko‘tarish uchun chaqirilgan kran 1,5 soatda kelgan, bola esa yarim soat davomida tirik bo‘lgan, yordamga chaqirgan. “FVVning 20 nafar xodimi kelib ko‘targanida, o‘g‘lim chiqqan bo‘lar edi”, — deydi ayol.
Foto: “Hududgazta’minot”
Ta’kidlanishicha, pastki qavatdagi xonadon egasiga portlash oqibatida yetkazilgan zararni qoplashga 200 million so‘m va uy ichidagi buyumlar uchun yana 50 million so‘m kompensatsiya to‘langan.
Sud hukmiga ko‘ra, sudlanuvchi A.U. Jinoyat kodeksining 259-modda (yong‘in xavfsizligi qoidalarini buzish) 2-qismi “a” va “b” bandlarida nazarda tutilgan jinoyatni sodir etganlikda aybli deb topilgan. Shu modda bilan bir yil muddatga moddiy javobgarlik bilan bog‘liq lavozimlarda ishlash huquqidan va 3 yilga ozodlikdan mahrum qilish jazosi tayinlangan. Shuningdek, sudlanuvchidan Nurafshon shahar hokimligi foydasiga 600 million so‘m miqdorida moddiy zarar undirilishi belgilangan.
Avvalroq Samarqand viloyati Kattaqo‘rg‘on tumanidagi uylarning birida havo-gaz aralashmasi portlashi sodir bo‘lgan edi. Keyinroq Bosh prokuratura holat yuzasidan jinoyat ishi qo‘zg‘atilganini bildirdi. “Hududgaz Samarqand” gaz ta’minoti matbuot xizmatining ma’lum qilishicha, portlash xususiy tadbirkorlik tarmog‘iga tegishli bo‘lgan gaz quvuridan gaz sizib chiqish oqibatida sodir bo‘lgan.
