Францияда собиқ депутат режалаштирган давлат тўнтаришининг олди олингани маълум қилинди

Франциянинг ички хавфсизлик бош бошқармаси давлат тўнтаришига уринишнинг олдини олди. Бу ҳақда Le Parisien нашри хабар берди.

Тергов маълумотларига кўра, Францияда ҳукуматни ўзгартиришни Демократик ҳаракат партиясининг собиқ депутати Реми Дайе ва унинг тарафдорлари режалаштирган. Аввалроқ Дайе вакцинация марказларига ҳужум уюштирганликда гумон қилиниб ҳибсга олинганди. Терговчилар Дайе олиб борган алоқаларни текшириб чиқди ва у бутун мамлакат бўйлаб филиалларига эга бўлган «террорчилик жамияти» тармоғини яратган, деган хулосага келди. Қайд этилишича, тармоқ таркибидан амалдаги ва нафақадаги полиция, жандармерия ва ҳарбий амалдорлар жой олган. Терговчилар фитна иштирокчилари ўртасидаги ёзишмаларнинг таҳлили асосида камида 36 нафар «капитан»ни аниқлади, уларнинг ҳар бири ўз ҳудуди учун жавобгар бўлган.

Тергов маълумотларига кўра, Дайенинг тарафдорлари полиция қалқонлари ва портловчи моддалар билан Елисей саройини, парламент, Ички ишлар вазирлиги ва Қуролли кучлар вазирлиги биноларини, шунингдек, ўз тарғиботларини эфирга узатиш мақсадида айрим телеканал ёки радиостанцияларни эгаллаб олишни режалаштирган. Режа «Лазур операцияси» деб номланган.

Дайенинг исёнга чақиришлари 2020 йил охирида Малайзияда бошланган, саккиз ёшли қизни ўғирлашда айбланган собиқ депутат, у ерда француз ҳуқуқ-тартибот идоралари ходимларидан яширинган. 2021 йил апрель ойида Дайе баъзи француз парламенти аъзоларига «республика энди ҳукмрон ғоя эмас», «ҳисоб-китоб вақти келди» деган шиорлар билан хабар юборди. Атиги бир депутат прокуратурага мурожаат қилган, шундан сўнг тергов бошланган.

Реми Дайенинг адвокати Жан-Кристоф Бассон Ларби мижозига қарши терроризм айбловларини рад этмоқда. Унга кўра, собиқ депутат «ўз сўз ва виждон эркинлигидан фойдаланган ҳолда мавжуд сиёсий тузумни тинч ва халқ йўли билан ағдариш»га чақирган.

Апрель ойида Франциянинг истеъфодаги генераллари ва зобитлари мамлакат президенти Эммануэль Макронга ирқий уруш ва давлат тўнтариши хавфи ҳақида огоҳлантирувчи очиқ хат ёзганди.

«Зўравонлик кун сайин ортиб бормоқда. Ўн йил олдин ким айта оларди ўз коллежидан кетаётган профессорнинг боши кесилади деб?», — таъкидлайди мактуб муаллифлари. Шунингдек, улар Макрон жим қараб турса, давлат тўнтариши содир бўлиши мумкинлиги ҳақида огоҳлантирган.