Fransiya harbiylari Makronni irqiy urush va davlat to‘ntarishi xavfidan ogohlantirdi
Fransiyaning iste’fodagi generallari va zobitlari mamlakat prezidenti Emmanuel Makronga irqiy urush va davlat to‘ntarishi xavfi haqida ogohlantiruvchi ochiq xat yozdi. Ularning maktubi Valeurs aktuelles nashrida e’lon qilindi, deb yozadi “Interfaks”.
Xabarga ko‘ra, maktubda iste’fodagi generallar va zobitlar yuzdan ortiq diniy aqidaparastlar va ekstremistlarning fransuz konstitutsiyasiga zid harakatlari oqibatida kelib chiqadigan fuqarolar urushi xavfini qayd etgan.
“Zo‘ravonlik kun sayin ortib bormoqda. O‘n yil oldin kim ayta olardi, o‘z kollejidan ketayotgan professorning boshi kesiladi deb?” — ta’kidlaydi maktub mualliflari.
Shuningdek, ular Makron jim qarab tursa, davlat to‘ntarishi sodir bo‘lishi mumkinligi haqida ogohlantirdi.
“Ko‘rib turganimizdek, ortga surishga vaqt yo‘q, aks holda, tobora kuchayib borayotgan bu betartiblikka ertaga ichki urush chek qo‘yadi va sizning zimmangizga tushadigan o‘limlar bir necha mingni tashkil qila boshlaydi”, — deya xulosa qildi iste’fodagi harbiylar.
Ommaviy axborot vositalarida e’lon qilingan murojaat o‘ngchilar yetakchisi Marin Le Pen va mingga yaqin faol armiya zobitlari va askarlari tomonidan qo‘llab-quvvatlandi, deb xabar bermoqda BBC News.
Qurolli kuchlar vaziri Florens Parley Qurolli kuchlar a’zolariga siyosiy yoki diniy mavzularda fikr bildirish taqiqlanganini eslatib o‘tdi. “Qoidabuzarlarga qarshi sanksiyalarni qo‘llash rejalashtirilmoqda”, — deya qo‘shimcha qildi u.
Avvalroq Makron Parij yaqinida politsiyachining o‘ldirilishini diniy ekstremizm deb atagan edi. Qotillik politsiya uchastkasining kiraverishida sodir etilgan. Jinoyatchi binoga kirayotgan ayolga hujum qilib, uning tomog‘iga pichoq urgan. Boshqa politsiya xodimlari jinoyatchiga qarata o‘q uzgan va u voqea joyida halok bo‘lgan.
Eslatib o‘tamiz, 2020-yilning oktabr oyida Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Muhammad Payg‘ambar (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik 18 yoshli muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.
Makron bu qotillikni “Islom terrorchiligiga xos xatti-harakat” deb atadi. U, shuningdek, Islom dini “butun dunyoda inqiroz holatini boshdan kechirayotgani” haqida fikr bildirdi.
Makronning bu gaplari ko‘plab davlatlarda musulmonlarning g‘azabiga sabab bo‘ldi. Ular Fransiya va Makronga qarshi noroziliklar bildira boshladi. Ba’zi namoyishchilar Fransiya bayrog‘i va Makronning suratlarini toptagan. Bunday norozilik aksiyalari Pokiston, Livan, Turkiya, Falastin va boshqa davlatlarda bo‘lib o‘tdi.
Keyinchalik Makron Muhammad (s.a.v.) karikaturalari tufayli musulmonlarda paydo bo‘lgan his-tuyg‘ularni tushunishini aytdi, ammo ularni hukumat emas, mustaqil OAVlar chiqarayotganini ta’kidladi.
2015-yil yanvar oyida ham bir nechta qurollangan odamlar Charlie Hebdo tahririyati ofisiga bostirib kirib, 12 kishini otib tashlagan edi, ulardan sakkiz nafari jurnalist bo‘lgan. Hujum uchun javobgarlikni Al-Qoidaning Yamandagi yo‘nalishi o‘z zimmasiga olgan. Terrorchilar Charlie Hebdo tahririyatini o‘z nishoniga aylantirgan, chunki nashr bir necha bor Payg‘ambar Muhammad (s.a.v.)ning karikaturalarini chop etgan. Charlie Hebdo hujumi Fransiyadagi islomchilar tomonidan uyushtirilgan qator hujumlarning boshlanishi bo‘ldi.
