Samarqand viloyatida 10 kun ichida is gazidan zaharlanish bilan bog‘liq 4 ta holat qayd etilgan. Bu haqda Past Darg‘om tumani hokimligida o‘tkazilgan brifingda FVB vakili Sirojiddin Abdullayev ma’lum qildi.
Uning so‘zlariga ko‘ra, Samarqand viloyatida is gazidan zaharlanish oqibatida 8 kishi vafot etgan va bir kishi og‘ir ahvolda shifoxonaga yotqizilgan. Halok bo‘lgan sakkiz nafardan besh nafari voyaga yetmagan bolalardir.
Holat yuzasidan olib borilgan o‘rganishlarda tabiiy gaz tarmog‘iga ulangan qo‘lbola isitish pechining tutun chiqarish mo‘risi tozalanmasdan, kechasi pechni yoqib uxlash oqibatida zaharlanish va o‘lim holati yuzaga kelgani ma’lum bo‘lgan. Ya’ni ikkita holatda isitish pechining mo‘risidan bahor, yoz davrida in qurgan qushlarning uyasi chiqqan bo‘lsa, boshqa holatda mo‘ri ichiga qushlarning uy qurmasligi uchun latta tiqib qo‘yib, uni olib tashlamasdan, isitish pechidan foydalanilgani aniqlangan. Oqibatda barcha zaharli gazlar xona ichiga to‘planib, fuqarolarning o‘limiga sabab bo‘lgan.
Abdullayevning ta’kidlashicha, oktabr oyining boshidan buyon 128 ta aholi uylarida turli ko‘lamli yong‘inlar sodir bo‘lgan, 3 kishi kuyish jarohatlarini olgan. Shuningdek, havo-gaz aralashmasining chaqnashi bilan bog‘liq ikkita holat qayd etilgan.
Eslatib o‘tamiz, 2020–2021-yilgi qish mavsumida Xorazmda 31 yoshli ayol va uning 10 yoshli qizi, Qoraqalpog‘istonda bir oilaning 4 nafar a’zosi va 2 nafar mehmon hamda Sirdaryoda 31 yoshli ayol va uning voyaga yetmagan 3 nafar farzandi is gazidan zaharlanib vafot etgani haqida xabar berilgandi. Shuningdek, Navoiyda ikki nafar aka-uka is gazidan zaharlanib vafot etgani, Samarqandda qo‘lbola pechdan is gazi sizib chiqishi oqibatida yosh er-xotin vafot etgani haqida xabar berilgan, keyinroq ular ikki kun avval turmush qurgani ma’lum bo‘lgandi.
Izoh (0)