Сеулда Жанубий Корея Интерпол ходимлари халқаро қидирувда бўлган Ўзбекистон фуқаросини чегара постини кесиб ўтиш вақтида қўлга олди. Бу ҳақда Интерполнинг Ўзбекистондаги Миллий марказий бюроси хабар берди.
Маълум қилинишича, қўлга олинган Ю.У. Жиноят кодексининг 168-моддасига (фирибгарлик) асосан, катта миқдордаги фирибгарлик жиноятини содир этгани учун Ўзбекистон ҳуқуқни муҳофаза қилиш органлари томонидан Интерпол каналлари орқали қидирувга берилган бўлган.
Ю.У. Жанубий Корея ҳудудида бўла туриб, Ўзбекистон фирмалари бирининг вакили бўлган фуқаро Ю.И.нинг ишончига кириб, мамлакатда ишлаш учун одам топиб беришини таклиф қилган.
Фуқаро Ю.И. чет давлатда ишлашни истаганларни топиб, улар банклар орқали фуқаро Ю.У.нинг ҳисоб рақамига 507,7 миллион сўм (54,6 минг доллар) ўтказиб юборган. Эвазига эса у Жанубий Кореяда ишлаш учун таклифномагина жўнатиб турган, шундан сўнг номаълум жойда яшириниб юрган.
Ҳозирда уни Ўзбекистонга экстрадиция қилиш чоралари кўрилмоқда.
Аввалроқ Ўзбекистонда фирибгарлик содир этгани учун халқаро қидирувда бўлган икки фуқаро Жанубий Кореядан экстрадиция қилингани тўғрисида хабар берилганди.
Изоҳ (0)