Жанубий Корея Республикасининг собиқ президенти Ро Де У Сеулда вафот этди, дея хабар берди унинг ёрдамчилари Yonhap агентлигига. У 88 ёшда эди.
Собиқ президент яқинда соғлиғи ёмонлашгани сабабли касалхонага ётқизилган. Шифокорлар унга ёрдам бера олмади. Ро Де У 1988 йилдан 1993 йилгача мамлакат президенти бўлган. У мамлакатнинг собиқ ҳарбий президенти Чон Ду Хвандан кейин демократик йўл билан сайланган биринчи давлат раҳбари эди.
1993 йилда Ро Де У коррупцияда айбланиб ҳибсга олинган, сўнгра 1980 йилги Кванжу намойишларини куч билан бостиришга боғлиқ ҳолда ватанга хиёнатда айбланган. 1996 йил август ойида Ро Де У 22 йиллик қамоқ жазосига ҳукм қилинди, кейинроқ унинг жазо муддати 17 йилга қисқартирилди, 1998 йилда эса у афв этилди.
9-октябрь куни Эроннинг биринчи президенти Абулҳасан Банисадр вафот этганди. Собиқ сиёсатчи 88 ёшда эди. Хабарга кўра Банисадр Париждаги Салпетри касалхонасида узоқ давом этган хасталик оқибатида вафот этган.
Эслатиб ўтамиз, сентябрь ойида Жазоирни 20 йил давомида бошқарган собиқ президент Абдулазиз Бутефлика вафот этган. Апрель ойида эса Чад давлатининг 30 йиллик президенти исёнчилар билан жангда ҳалок бўлган, шунингдек, АҚШ собиқ вице-президенти Уолтер Мондейл 93 ёшида вафот этганди.
Мавзуга доир:
Изоҳ (0)