Туркия жанубида ўрмонга ўт қўйганликда гумон қилиниб, етти нафар Россия фуқароси қўлга олинди. Бу ҳақда Россиянинг Анталиядаги бош консулхонасига таяниб, «ТАСС» хабар берди.
Қайд этилишича, россиялик сайёҳлар гуруҳи 23 октябрь куни Анталия яқинидаги Ликия сўқмоғи бўйлаб ҳаракатланаётган пайтда қўлга олинган. Улар Чагларжа туманидаги ўрмонга ўт қўйишда гумон қилинмоқда.
Шу куни Россия Бош консулхонаси ходими россияликларнинг ҳибсга олиниши сабабларини билиш учун жандарм участкасига ташриф буюрган.
Суд мажлиси 24 октябрь куни бўлиб ўтди. Адвокатларнинг арзномасига қарамай, суд воқеа тафсилотлари бўйича терговгача бўлган даврда россиялик сайёҳларни ўрмонга беихтиёр ўт қўйишда гумонланувчи сифатида ҳибсга олишга қарор қилди.
База Telegram канали хабарига кўра, қўлга олинганлар ёнғинни ўзлари бошламаганини, аксинча уни ўчиришга ҳаракат қилгани ва фавқулодда хизматларни чақирганини таъкидламоқда.
Эслатиб ўтамиз, июль охири—август бошида Туркияда ўрмон ёнғинлари авж олди. Улар сабабли жами 160 минг гектарга яқин ўрмон вайрон бўлди. Ёнғинлар Манавгатда 30 минг гектар, Бодрумда 12,6 минг гектар, Мармарисда 8 минг гектар ва Анталиядаги Гузелбоғ атрофида 6,5 минг гектар ўрмонларга зарар етказди.
Маҳаллий ОАВ хабарига кўра, «Олов болалари» террорчилик ташкилоти ўрмон ёнғинлари учун жавобгарликни ўз зиммасига олган. Туркия президенти Ражаб Тоййиб Эрдўғон ёнғинлардан вайрон бўлган ҳудудларни тиклаш учун киши бошига уч тупдан кўчат экишга ваъда берди.
Изоҳ (0)