Туркия президенти Ражаб Тоййиб Эрдўғон туркиялик ҳуқуқ ҳимоячиси ва жамоат арбоби Усмон Кавалани қамоқдан озод этишга чақирган 10 та мамлакат элчиларини Туркиядан чиқариб юбормоқчи, деб ёзади Daily Sabah.

«Мен ташқи ишлар вазирига бу элчиларни имкон қадар тезроқ persona non grata деб эълон қилишни топширдим», — дея Эрдўғоннинг сўзларини келтиради Daily Sabah. Persona non grata деб эълон қилинган дипломат маълум муддатдан кечиктирмай мезбон мамлакатни тарк этиши керак.

18 октябрь куни АҚШ, Канада, Германия, Франция, Финляндия, Дания, Нидерландия, Норвегия, Швеция ва Янги Зеландия элчихоналари Туркияда тўрт йил аввал ҳибсга олинган Усмон Каваланинг озод этилишини талаб қилиб мурожаат қилганди. Улар Туркия ҳукуматини Инсон ҳуқуқлари бўйича Европа суди талабини бажаришга ва Кавалани қўйиб юборишга чақирган.

Мурожаат чоп этилгач, элчилар Туркия Ташқи ишлар вазирлигига чақирилган ва у ерда мамлакат ички ишларига аралашишга уринишда айбланган. Эрдўғон элчиларни Туркиядан чиқариб юбориши мумкинлиги ҳақида огоҳлантирган.

Асли Парижда туғилган филантроп ва жамият фаоли, 64 ёшли Усмон Кавала 2017 йил ноябрь ойида ҳибсга олинган. У Истанбулдаги Гези боғи атрофидаги оммавий намойишларда иштирок этганликда ва 2016 йилда давлат тўнтаришига уринганликда айбланган. Кавалага қўйилган айбловлар бир неча бор кўриб чиқилган, бироқ у ҳануз ҳибсда қолмоқда.

Европа суди 2019 йилда Туркия ҳуқуқ-тартибот идораларида Кавалани ҳибсда ушлаб туриш учун салмоқли далиллар йўқлиги ҳақида қарор чиқарган. Туркия ҳукумати суднинг қарорини бажармади.

Усмон Кавала фуқаролик жамиятини ривожлантиришга қаратилган лойиҳаларда фаол иштирок этган. Хусусан, у Туркияда Сорос «Очиқ жамият» фондининг фаолиятини ташкил қилган.