Россияда бир суткада 1072 киши коронавирусдан вафот этди. COVID-ўлимлар сони кетма-кет олтинчи кун мингтадан ортди

Россияда 24 октябрь Тошкент вақти билан соат 13:15 ҳолатига кўра, бир суткада 35 660 кишида COVID-19 аниқланди. Бу ҳақда коронавирусга қарши кураш бўйича федерал тезкор штаб маълумотига таяниб, Meduza хабар берди.

COVID-19 билан касалланиш бўйича янги ҳолатларнинг аксарияти Москва (+5279 киши) ва Санкт-Петербургда (+3297) қайд этилган. Москва вилоятида пандемия бошидан бери биринчи марта уч мингдан ортиқ (+3030), Самара вилоятида ҳам биринчи марта мингдан ортиқ (+1093) янги ҳолат аниқланган.

Аввалги суткада Россияда 37 мингдан ортиқ кишида коронавирус қайд этилганди. Россиянинг COVID-19 га қарши кураш бўйича федерал тезкор штаби маълумотларига кўра, мамлакатда пандемия бошидан бери COVID-19 юқтирганларнинг умумий сони 8 241 643 нафарни ташкил этмоқда.

Ўтган бир кеча-кундузда Россияда 1072 киши коронавирусдан вафот этди. Мамлакатда 19 октябрдан бери ҳар куни COVID-19 туфайли мингдан ортиқ ўлим қайд этилган, пандемия бошидан буён жами 230 600 киши касаллик қурбони бўлган, дейилади тезкор штаб маълумотларида.

Шунингдек, ўтган суткада Россияда 22 784 киши коронавирусдан тузалди. Пандемия бошидан бери касалликдан соғайганлар сони 7 165 921 кишини ташкил этди, дейилади хабарда.

Россия президенти Владимир Путин мамлакатда коронавирус инфекцияси билан касалланиш ҳолатлари ортаётгани сабаб 30 октябрдан 7 ноябрга қадар иш кунини ишга чиқилмайдиган ҳафталик дея эълон қилган. Эпидемиологик вазият кескин тус олган вилоятларда ишланмайдиган ҳафталикни олдинроқ жорий этишга рухсат берилган. Масалан, Москва ва Москва вилоятида ишга чиқилмайдиган кунлар 28 октябрдан бошланади.

Аввалроқ Россияда COVID-19 нинг янги тўлқини юз бераётгани, бунга коронавируснинг дельта («ҳиндча») штамми билан боғлиқ вазият сабаб бўлгани тўғрисида хабар берилганди.