Россиянинг «Газпром» компанияси Молдовага газ етказиб беришни бутунлай тўхтатиш билан таҳдид қилди. Энергетика инқирози сабабли республикада аввалроқ фавқулодда ҳолат эълон қилинганди

Агар Молдова ёнилғи учун қарзини тўламаса ва янги шартнома шартларига рози бўлмаса, 1 декабрдан Россиянинг «Газпром» компанияси республикага газ етказиб беришни бутунлай тўхтатади. Бу ҳақда «Газпром» расмий вакили Сергей Куприянов маълум қилди.

Молдованинг газ учун асосий қарзи 433 миллион доллар, тўловлар кечикканини ҳисобга олсак, қарзнинг умумий миқдори 709 миллион долларни ташкил этади, дейди компания вакили.

Куприяновнинг айтишича, «Газпром» Молдовани ноябрь ойида газ билан таъминлаш бўйича шартномани узайтиришга тайёр, аммо сентябрь ва октябрь ойларида етказиб берилган ёнилғи учун тўлов қилиниши шарт. Бундан ташқари, янги шартнома тузиш керак.

«Бу ерда ҳеч қандай сиёсат йўқ, ‘Газпром’ — акциядорлик жамияти, у зарар билан ишлай олмайди ва Россия Федерацияси бюджетига тушадиган солиқ тўловларини бой беришга йўл қўёлмайди. Сабрнинг ҳам чегараси бор. Молдова инқирозни ўз қўли билан келтириб чиқармоқда», — деди у.

22 октябрь куни Молдовада энергия инқирози туфайли фавқулодда ҳолат эълон қилинганди. Республика бош вазири Наталья Гаврилицанинг айтишича, октябрь ойида Россиядан зарур миқдордаги газ уч ҳисса камроқ импорт қилинган.

Газ узатиш тармоғидаги паст босим туфайли Молдова Мудофаа вазирлиги пойтахт Кишинёвдаги Мангу оловни ўчирганди. 23 октябрь куни ёдгорликка газ етказиб бериш қайта тикланди. «Бу техник хато бўлган. У бартараф қилинди», — деди Молдова бош вазири.

Музокараларни давом эттириш билан бирга Молдова октябрь ойининг охиригача газни бозор нархида — минг кубометрни 790 доллардан сотиб олади. Республика минг кубометрга 200—300 доллар тўлаш бўйича «Газпром» билан келишувга эришишга умид қилмоқда.

Бир неча кун олдин музокараларнинг навбатдаги раунди бўлиб ўтди. ОАВ хабарига кўра, унда «Газпром» «25 фоиз чегирма билан адолатли бозор нархини» таклиф қилган, Молдова бундай шартлардан қониқмаган.

Россия ва Молдова ўртасида газ етказиб бериш тўғрисидаги шартнома 2006 йилда имзоланган ва кейин бир неча бор узайтирилган, сўнгги марта шартнома муддати 30 сентябрда тугади. Шу куни томонлар уни октябрь ойининг охиригача узайтирди. Келишувларга мувофиқ, газ нархи ҳар чоракда жаҳон бозорида ёнилғи нархининг динамикасини ҳисобга олган ҳолда махсус формула асосида қайта кўриб чиқиларди.