Ташқи ишлар вазири Абдулазиз Комилов Тошкентнинг Яккасарой туманида ташкил этилган 573-сайлов участкасига келиб, президент сайловида овоз берди. ТИВ матбуот хизмати томонидан «Дарё»га тақдим этилган суратларнинг бирида қўлига фуқаролик паспортини тутиб олган вазир бюллетен олиш учун навбатда турганини кўриш мумкин.
Эслатиб ўтамиз, Ўзбекистонда 24 октябрь куни соат 08:00 дан бошланган президент сайлови соат 20:00 га қадар давом этади. Соат 11:00 га қадар Ўзбекистондаги жами 19 миллион 859 минг 127 сайловчиларнинг 6 миллион 669 минг 552 нафари, яъни 33,6 фоизи овоз берди ва сайлов ўтган деб эълон қилинди.
Бир қатор вилоят ҳокимлари, жумладан Қашқадарё, Сурхондарё, Сирдарё, Бухоро, Фарғона, Хоразм ва Тошкент вилояти ҳокимлари, шунингдек, Тошкент шаҳар ҳокими Жаҳонгир Ортиқхўжаев биринчилар қаторидан президент ўзи муносиб деб топган номзодга овоз берди. Бош вазир Абдулла Арипов, Сенат раиси Танзила Норбоева ҳам оиласи билан бирга президентлик сайловида иштирок этди.
Ўзбекистон президенти сайловида иштирок этаётган номзодларнинг ҳам бари овоз бериш ҳуқуқидан фойдаланиб бўлди. Бешала номзод овоз бериш жараёнида оила аъзолари билан бирга қатнашди.
Марказий сайлов комиссияси раиси Зайниддин Низомхўжаевнинг маълум қилишича, президент сайлови қонунчилик ва демократик тамойилларга асосланган ҳолда бўлиб ўтмоқда.
Изоҳ (0)