Кобул яқинида содир бўлган портлаш оқибатида Афғонистон пойтахти ва унга ёндош вилоятлар электр энергиясисиз қолди. Портлашга айнан нима сабаб бўлгани ҳозирча номаълум, деб хабар беради «Коммерсантъ».
Афғон энергетика корпорациясининг маълум қилишича, портлаш Қалъа Мурад Бег туманида содир бўлган, кўнгилсиз ҳодиса оқибатида электр узатиш тармоғига шикаст етган. Компания фавқулодда ҳолат содир бўлган жойга ўз муҳандисларини юборган бўлиб, улар «вазият тақазо этиши» билан ишга киришади.
Кобулда электр энергияси 21 октябрь куни Тошкент вақти билан соат 20:00 да ўчган. Афғонистон пойтахтида 4,5 миллионга яқин одам истиқомат қилади. Корхоналар ва яхши таъминланган оилаларнинг уйларида шахсий электрогенераторлар ишламоқда.
Сўнгги бир ой ичида мамлакатда иккинчи бор электр энергияси узилмоқда. Ўтган сафар Кобул 13 октябрь куни электрсиз қолган эди, ўшанда бунга «техник муаммолар» сабаб бўлган. The Wall Street Journal «Толибон» томонидан тузилган янги афғон ҳукумати электр энергия етказиб берувчиларга пул тўламаётгани ҳақида ёзганди.
Изоҳ (0)