Пул мукофоти билан тақдирланган самбочилар, ОЧЛда тенгсиз деб топилган Машарипов ва «Олтин тўп» учун танловини айтган Зидан. Энг сўнгги спорт янгиликлари

Дунё ва ўзбек спортига оид 19 октябрь кунининг энг муҳим хабарлари дайжести билан танишинг.

Ўзбекистон

Жаҳон чемпионатида 2-ўринни эгаллаган ёш самбочиларга пул мукофотлари топширилди

Самбо бўйича Ўзбекистон ёшлар ва ўсмирлар терма жамоаси 15—17 октябрь кунлари Грециянинг Салоники шаҳрида бўлиб ўтган Жаҳон чемпионатида умумжамоа ҳисобида иккинчи ўринни эгаллаган спортчиларга пул мукофотлари топширилди.

Туризм ва спорт вазирлиги матбуот хизматига кўра, жаҳон биринчилигида чемпиони бўлган самбочилар 10 миллион сўм, кумуш медал эгалари 5 миллион сўм, бронза медалини қўлга киритганлар эса 3 миллион сўм миқдоридаги мукофотга эга бўлган.

Ўзбекистон миллий терма жамоаси Грузия билан ўртоқлик ўйини ўтказади

Ўзбекистон миллий терма жамоаси ноябрь ойида Тошкент ва Тбилиси шаҳарларида ўқув-машғулот йиғини ўтказади. Ушбу йиғин давомида Сречко Катанец шогирдлари Грузия терма жамоаси билан ўртоқлик учрашувида майдонга тушади. Мазкур баҳс 15 ноябрь куни 19:00 да Тбилисидаги «Борис Паичадзе» стадионида бўлиб ўтади.

Машарипов ОЧЛ чорак финалининг энг яхши ўйинчиси деб топилди

Ўзбекистон миллий терма жамоаси ва «Ан-Насср» клуби ҳужумкор ярим ҳимоячиси Жалолиддин Машарипов Осиё Чемпионлар Лигаси чорак финалининг энг яхши футболчиси деб топилди ва рамзий терма жамоадан жой олди.

Жалолиддин Машарипов тўп сурадиган «Ан-Насср» жамоаси Чемпионлар Лигаси чорак финалида БААнинг «Ал-Ваҳда» жамоасини 5:1 ҳисобида мағлуб этиб, ярим финалга йўл олди. Машарипов учрашувда иккита гол урди ва битта голли узатмани ўз ҳисобига ёздириб қўйди.

Қайд этиш керак, «Ан-Насср» ОЧЛ ярим финали доирасида «Ал-Ҳилол»га қарши ўйнайди. Учрашув 19 октябрь куни 23:00 да бошланади.

Суперлига 23-турининг иккита ўйинида VAR тизими ишлайди

Футбол бўйича Ўзбекистон чемпионатининг 23-тур баҳслари 21—25 октябрь кунлари бўлиб ўтади. ПФЛ мазкур баҳсларда фаолият олиб борадиган ҳакамлар номини эълон қилди. Тур доирасидаги иккита ўйинда VAR тизими ишлайди: «Металлург» — «ОКМК», «Бунёдкор» — «Турон».

Жаҳон

Руни «Ньюкасл»ни бошқаришга қизиқмоқда 

«Манчестер Юнайтед» ва Англия терма жамоаси собиқ ҳужумчиси Уэйн Руни саудияликлар қўлига ўтган «Ньюкасл»ни бошқаришга қизиқмоқда.

ChronicleЛиве нашрига кўра агар жамоанинг айни дамдаги устози Стив Брюс «Ньюкасл»ни тарк этса, қисқа муддат давомида «қарғалар» бошқарувини ўз қўлига олиши тайёр.

Руни ҳозирда «Дерби Дерби»ни бошқармоқда ва молиявий муаммолар туфайли исталган вақтда клубни тарк этиши мумкин.

Ляказетт фаолиятидаги 200-голини урди

«Арсенал» ҳужумчиси Александр Ляказетт АПЛ 8-турида «Кристал Пэлас»га қарши ўйинда (2:2) гол урди.

Бу гол франциялик футболи учун профессионал фаолиятидаги 200-гол бўлди. Ляказетт шундан 129 тасини «Лион» сафида урган бўлса, 68 таси «Арсенал»даги фаолиятига тўғри келади. Яна 3 та голни эса Франция терма жамоасида урган.

«Манчестер Сити» Стерлинг учун нарх белгилади

«Барселона» «Манчестер Сити» вингери Раҳим Стерлингга қизиқиш билдираётгани ҳақида хабар берилганди.

Marca нашрига кўра, «Барселона»га ушбу трансферни амалга ошириш осон бўлмайди. «Шаҳарликлар» футболчиси учун 80 миллион евро (тахминан, 68 миллион фунт) олмоқчи. Ушбу сумма каталон клуби учун оғирлик қилиши мумкинлиги айтилмоқда.

Аввалроқ, «Барселона» Стерлинги қишда сотиб олиш мажбурияти билан ижарага олмоқчилиги хабар қилинганди.

Зидан «Олтин тўп»ни Бенземага беришни таклиф қилди

«Реал» собиқ бош мураббийи Зинедин Зидан «Олтин тўп»ни ким олиши кераклиги ҳақида ўз фикрлари билан ўртоқлашди.

«Бензема ‘Олтин тўп’га лойиқ. У ажойиб футболчи ва мен унга мураббийлик қилиш шарафига муяссар бўлганман. У майдонда ҳамма нарса қила олади. Карим жуда юқори даражали ўйинчи, у мукофотланади деб умид қиламан. ‘Олтин тўп’ни унга берган бўлардим», — дейди Зидан.