Дунё авиакомпаниялари самолётларининг учувчилари коронавирус пандемияси туфайли узоқ давом этган танаффусдан кейин ишга қайтгач, ҳавода тобора кўпроқ хатоликларга йўл қўймоқда. Бу ҳақда Bloomberg компаниялар ходимларига таяниб хабар берди.
Мисол тариқасида нашр сўнгги ойларда АҚШда юз берган баъзи ҳодисаларни келтириб ўтди.
Америка авиакомпанияларидан бирининг учувчиси мажбурий танаффусдан кейин ишга қайтгач, парвоз қилиш учун ўз самолётининг иккинчи двигателини ишга туширишни унутган. У парвозни ўз вақтида тўхтатмаганида, бу хатолик ҳалокатга олиб келиши мумкин эди.
Яна бир учувчи етти ойлик танаффусдан сўнг ишга қайтиб, самолётни қўндириш чоғида шассини очмаганини жуда кеч тушунган ва учиш-қўниш йўлагига атиги 240 метр қолганида иккинчи марта айланиб, сўнг қўнган.
Яқинда эса борт капитани ярим йил ичида биринчи марта рулга ўтириб, аэропортдан учиб чиққандан кейин самолётни бошқа томонга қараб олиб кетган.
Нашр қайд этишича, бу хавфсизликка таҳдидларни аниқлашга мўлжалланган тор профилли маълумотлар базасида учувчилар томонидан махфий тарзда маълум қилинган ҳолатларнинг ҳаммаси эмас. Воқеаларнинг ҳар биттасида экипаж ўз компаниясини пандемия чоғида парвозлар етишмаслигида айблаган.
«Бу ҳақиқатан ҳам мушкул вазият. Бахтсиз ҳодисалар ҳозир соҳага керак бўлган сўнгги нарса», — дея Bloomberg Deutsche Lufthansa АG компанияси учувчиси Уве Хартернинг гапларидан иқтибос келтирди, у 2020 йил февралидан буён парвозларга чиқмаган.
Учувчининг сўзларига кўра, баъзи авиакомпаниялар уларга тегишли қайта тайёрлов курсини тақдим этмоқда, аммо уларнинг аксарияти «энг минимум» имкониятларни таклиф этмоқда ёки умуман ҳеч қандай чора кўрмаяпти.
Bloomberg эслатишича, ўтган йили авиация соҳаси 138 миллиард доллар йўқотган бўлса, 2021 йилда яна 52 миллиард зарар кўрилиши кутилмоқда.
Изоҳ (0)