Британия ҳукумати парламент депутати сер Дэвид Эмессни ўлдиришда гумонланувчи шахснинг исм-шарифини расман эълон қилди. BBC ёзишича, унинг исми Али Ҳарби Али. У 25 ёшда бўлиб, келиб чиқиши сомалилик Буюк Британида фуқаросидир.
Нашр маълумотларига кўра, бир неча йил аввал ҳукумат унга экстремизмга ва фуқароларнинг радикаллашувига қарши курашга қаратилган Превент дастуридан ўтишни тавсия қилган. Ушбу дастурда иштирок этиш ихтиёрий бўлиб, ундан бош тортганлик учун жиноий жавобгарлик кўзда тутилмаган.
Айни вақтда The Sunday Times аниқлаштиришича, Али Ҳарби Али Сомали бош вазири собиқ маслаҳатчиси, Лондонда яшовчи Ҳарби Али Кулланнинг ўғли. «Мен кучли руҳий зарба олдим. Бу ҳечам мен кутган ёки орзу қилган нарса эмас», — деди Ҳарби Али Куллан нашрга.
Дэвид Эмесс 15 октябрь куни сайловчилар билан учрашувда ўлдирилганди. Депутатга Лондондан 65 километр шарқда жойлашган Эссекс графлигининг Ли-он-Си шаҳридаги черков қабулхонасида ёш йигит пичоқ билан ҳамла қилди. Ҳужум қилган шахс қўлга олинди. Британия ҳукумати Эмесснинг ўлдирилишини теракт деб атади.
Изоҳ (0)