Шифокорлар Британия қироличаси Елизавета II га спиртли ичимликларни мунтазам истеъмол қилишдан воз кечишни ва тадбирларда ичмасликни тавсия қилди. Бундан қироличанинг соғлиғини сақлаш ва 2022 йилда ўтказиладиган платинум юбилейини энг яхши шаклда нишонлаш мақсад қилинган, деб ёзади Daily Telegraph.
Қироллик саройидаги хабардор манбаларнинг маълум қилишича, қиролича бу тавсияни жиддий қабул қилиб, спиртли ичимликлардан бутунлай воз кечишга қарор қилган, бироқ илгари ҳам уни кўп ичади деб бўлмасди. Энди у ҳатто севимли «Мартини» коктейлларидан воз кечди ва фақат Malvern сувини ичмоқда, бу унинг шахсий танлови, дея қўшимча қилди манбалар.
Шу билан бирга, 95 ёшли қиролича графикка мувофиқ мамлакат бўйлаб фаол сафар қилиш ва тадбирларда қатнашишда давом этмоқда.
Миш-мишларга кўра, қиролича уйда тушлик пайтида дубоннет коктейли билан жин, кечки овқатдан олдин эса жин ва мартини аралашмасини ичишни яхши кўрарди. Одатда ичимликларни қироличанинг турмуш ўртоғи, Эдинбург герцоги Филипп аралаштирган, унинг ўзи пивони афзал кўрарди. Нашр манбаси, шаҳзоданинг вафотидан кейин, ўнлаб йиллар давомида икки киши бўлиб ичишга одатланиб қолинган коктейллар Елизаветанинг ўзига ортиқ завқ бағишламаслиги мумкин, деб тахмин қилди.
Бундан ташқари, қиролича бир стакан Рейн виноси ёки қизил вино ичиши мумкин эди, лекин у шампанни ҳеч қачон ёқтирмаган.
Daily Telegraph манбаларига кўра, қироличанинг соғлиғи яхши, лекин яқинда уни 2004 йилдан буён биринчи марта ҳассада кўришган.
Изоҳ (0)