Гиёҳванд моддалар ишлаб чиқариш муаммоси Афғонистонда ҳалигача долзарб бўлиб қолмоқда, мамлакат янги ҳукумати учун бундай фаолиятдан тушган даромаддан воз кечиш осон бўлмайди. Россия президенти Владимир Путин шундай фикрда.
«Афғонистонда гиёҳванд моддалар ишлаб чиқариш ва уларни контрабанда йўли билан бошқа давлатларга ўтказиш муаммоси ҳалигача ўта кескин. Афғонистон дунёдаги энг йирик афюн таъминотчиси бўлиб қолмоқда. Гиёҳванд моддалар етиштиришга қарши курашишни ваъда қилганига қарамай, «Толибон» аслида буни уддалаяптими, ўзи бу билан шуғулланяптими ёки шуғулланишни истамаяптими, менга қоронғи. Улар аввалги сафар ҳокимиятга келганида, принципиал жиҳатдан буни амалга оширган ва муваффақиятга эришган. Аммо бугун, айниқса, иқтисодиётдаги инқирозли вазиятда бундай даромад манбайидан воз кечиш осон бўлмайди», —деди Путин 15 октябрь кун бўлиб ўтган Мустақил Давлатлар Ҳамдўстлиги саммитида.
Россия президенти «Толибон» билан мулоқот қилиш зарур, лекин уларни тан олишга шошилмаслик керак, деб ҳисоблайди.
«‘Толибон’ни расман тан олишга шошилишнинг кераги йўқ. Биз улар билан мулоқот қилиш зарурлигини тушуняпмиз, аммо бу борада ҳам шошилмаслик керак», — деди Путин.
Аввалроқ «Толибон» Москвадаги музокараларга таклиф қилинганди. 20 октябрь куни Афғонистоннинг янги ҳукумати билан учрашув бўлиб ўтиши кутилмоқда. Охирги марта «Толибон» делегацияси Россияга июль ойида ҳали Афғонистонда ҳокимиятни қўлга олишидан олдин ташриф буюрган.
Изоҳ (0)