Зангиотадаги ковид-касалхонада 2021 йил бошидан буён қанча чақалоқ туғилгани маълум қилинди

Зангиота туманидаги 1-сонли юқумли касалликлар шифохонасида 2021 йил бошидан буён 377 нафар чақалоқ дунёга келди. Бу ҳақда муассаса директори Анвар Ҳусанов Соғлиқни сақлаш вазирлигига маълум қилди.

Унинг айтишича, 15 октябрь ҳолатига кўра, бу ерда 1350 нафардан зиёд бемор даволанмоқда. Улардан 39 нафари ўта оғир, 219 нафари оғир, 933 нафари ўрта оғир ҳолатда. Шунингдек, жонлантириш бўлимларида 170 нафар бемор шифокор ва ҳамшираларнинг доимий назорати остида.

«Болалар ўртасида ҳам касалликка чалиниш кўрсаткичлари, афсуски, ҳануз юқори. Буни муассасада 18 ёшгача бўлган 167 нафар ўғил-қиз (жами беморларнинг 12,3 фоизи) даволанаётгани ҳам тасдиқлайди. Улардан 3 нафари айни пайтда жонлантириш бўлимида муолажа олмоқда.

Бинобарин беморлар орасида 122 нафар ҳомиладор аёл ҳам мавжуд. Кеча бу ерда 2 нафар чақалоқ дунёга келди. Натижада йил бошидан буён Зангиота 1-сонли юқумли касалликлар шифохонасида туғилган гўдаклар сони 377 нафарга етди», — деган шифохона директори.

Маълумот учун, Тошкент вилояти Зангиота туманидаги 1-сонли махсус шифохона ва 2-сонли махсус шифохона коронавирус билан касалланган беморларни даволаш учун кетма-кет қурилган. Муассаса 2 минг ўринга мўлжалланган. Лекин 4 минг ўрингача трансформация қилиш имконияти бор. Касалхона 2020 йилнинг 6 июлидан беморларни қабул қила бошлаган ва очилганига бир ҳафта бўлмасдан коронавирус беморларига тўлганди.

Соғлиқни сақлаш вазирининг 2020 йил декбаридаги буйруғи билан Зангиота туманидаги 1-сонли юқумли касалликлар шифохонаси таркибида коронавирусга чалинган ёки унга гумон қилинган шошилинч терапевтик ёрдамга муҳтож беморлар ҳамда ҳомиладорлар учун бўлим очилган.

Муассасада ҳомиладор аёллар учун 158 ўринли туғруқ комплекси бўлиб, шундан ҳомиладорлар патологияси бўлими 146 та, реанимация бўлими 12 та ўринга мўлжалланган.